Lawngtlai, September 14, 2022 : Pu Sapliana Vandir, Ex-MLA, President BJP Lai Autonomous District Hqrs: Lawngtlai chuan September 12, 2022 (Thawhtan zan) khan Bethel Veng, Lawngtlaiah BJP zawm thar chhungkua 13, Voters 40 te chu BJP ah a lawmlut.
Lawmluh inkhawmah thusawiin, Pu Sapliana Vandir chuan, BJP in ram leh hnam hmasawnna tur atan theihtawp chhuahin a bei mek a, hlawhtlinna pawh kan hmu tep tawh a ni. BJP thiltum pawimawh tak chu hnam hnuaihnung zawk te chawikan a, an dikna chanvo hmasawnna pek hi a ni. Chumi tur atan chuan Central a Pu Modi-a PM kaihhruai Sorkar chuan nasa takin hma ala mek a, In neilo te hnena insak tanpuina pek te, Lo neitute hnena tanpuina pek te leh thil dang tam takin hma ala a ni. Chuvangin, keini hnam tlem zawk te dinhmun chawikan duhtu BJP hian tun atanga rei vakloah ADC dinhmun hi min chawikan sak a tum a, chumi tur atan chuan theihtawpin kan inbuatsaih a ngai a ni, a ti.
Pu T. Zakunga MDC chuan, engtikniah emaw chuan thiltitheiin an rawn la let leh dawn tih sawiin, ‘chutih hunah chuan vawiinni a Party tana thahnemngai taka bei hram hramtute hi inhming lamrik hmasak a ni dawn a ni. Kawng kan zawh mek hi ram leh hnam damna tur kawng a ni a, he kawng la zawh ve remchanglo te pawhin hlawhtlinna kan chan hunah chuan, BJP hi rawn bél a, min tawiawm turin kan sawm a ni’ a ti.
Pu T. Zakunga chuan, vawiinnia min nuihzat a, kawngtin renga min sawichhetute hian, hlawhtlinna kan channiah chuan min rawn la bél dawn tho tho tih hi kan ring a ni. Ram leh hnam a damloh chuan, nang leh kei hi kan dam ngai dawn lo a ni. Chuvangin, BJP ten kan buaipui mek ram leh hnam damna tur politics diktak chu a ni a, ti bawk
He lawmluhna inkhawm ah hian BKP District Hqrs atangin Pu K. Lalawmpuia, General Secretary leh Pu TC. Rorelliana, General Secretary te pawh an tel a ni.
Post a Comment