Sorkar hnathawk hlawh sem tihtlai a nih dawn chhan hi sum harsatna vang a ni
Rauthla, August 01, 2022 : Finance department hotute chuan Mizoram sorkar hnathawkte’n July thla hlawh an la tlai dawn a, central sorkar-in thlakipa state sorkar sum a pek lo thlen hunah an lak theih beisei a ni an ti.
Finance department hotute sawi danin, hetianga sorkar hnathawk hlawh sem tihtlai a nih dawn chhan hi sum harsatna vang a ni a. Sorkar laipuiin share of central taxes leh post revenue deficit grant a rawn pek chhuah hunah hlawh hi pekchhuah theih tum a ni. Sorkar department hrang hrang chuan an hnathawkte hlawh tur pay bill hi tun thla ni 20 bawr vel khan an thehlut vek tawh a. Mahse, an lak theih hun tur a hriat rih loh thu treasury officer-te’n an lo hrilh ni a thudawn a ni. Aizawl South leh Aizawl North Treasury-in pawisa an pek chhuah hnuhnun’ ber chu July ni 21 kha a ni a, hemi hnu hian sum hman khuahkhirh a nih tak avangin pawisa an pechhuak leh ta rih lo a ni.
Finance department hotu pakhatin sawi danin tunhma a ‘official taka’ treasury khar ang kha a nih loh thu a sawi a. Tunah hian rikrum thil leh tul bik thilah chuan pawisa hman tur a awm niin a sawi. Reserved Bank of India (RBI) a Mizoram sorkar account a ngei ngei a awm tur a mawngphah pawh lakchhuah a la awm loh thu a sawi bawk a. Chutih lai chuan sum harsatna avangin special drawing facility leh ways and means hmanga sum puk a nih tawh thu a sawi a ni.“ Hetianga sum harsatna a awm chhan hi tunhnaiah sorkar laipuiin centrally sponsored scheme (CSS) sum a pekchhuahte chu ni 21 chhunga a hmangtu tur department-a pe vek tawh tura state zawng zawng a hriattir vang a ni ber a. Mizoram sorkarin CSS sum, RBI-a Mizoram sorkar account-a hman lohva a lo dahte chu a hlawma pekchhuah a ngai ta a, vaibelchhe 600 vel lai pekchhuah a nih tak avangin harsatna hi a lo thleng ta a ni.
Finance department hotute chuan General Financial Rules leh Treasury Rules in hman nghal mai loh tur department-in pawisa hlawm lian an kawl a khap avangin tunhma zawng zawng chuan an sum hman dan ang zelin CSS sumte hi a tahtawlin department-ah pek a nih thin thu an sawi a. Chubakah RBI-a sorkar account-a a awm khan sum harsatna awm thei a veng a, phal a nih tak lohva, a hlawma sum tam tham vawi leh khata pekchhuah a nih takah khan sorkarin sum harsatna a tawk ta a ni, an ti.
Post a Comment