Chawngte, August 8, 2022 : Chawngte Group YMA leh Central YCA tangkawp ten Chawngte mipui mamawh sorkara an thlente tihhlawhtlin a nih loh avanga lungawilohna lantirin vawiin khan kawng an zawh an huaihawt.
Chawngte ‘L’ kawtchhuaha kawng zawh tanah hian Chawngte Group YMA President Pu ZD Ramngamzauva leh CYCA President Dr. Jyotir Moy Chakma in thu an sawi. ten thu an sawi a. Chawngte khawpui chhung mipui mamawh tam tak zinga point nga Mizoram sorkar an thlen chu tihhlawhtlin a la nih loh avangin sorkara an lungawilohna chu an lantir tih an sawi.
Chawngte Group YMA leh Central YCA te thil ngen te zinga Chawngte Power Sub Station-a Panel Board dah sak tura an ngenna chu sorkarin bawhzuiin Mizoramah chah thlen tawh a ni a, reiloteah hman theih beisei a ni tih tarlan a ni a, CHC Chawngteah MBBS doctor nghet an awm lova, X-Ray technician an awm lova, Nurse leh thawktu dang pawh an indaih lo tih sawiin, a rang thei ang bera dah an phut tih an sawi a. Chawngte Police Station-a thawktu indaihlohna pawh phurhuk thuai an duh thu te, a bikin hmeichhe police pek tel an phut tih an sawi a, Chawngte Sub-Divisional Officer Office-ah SDO leh IV Grade regular pakhat chuah thawktu awm chu thawktu dah belh tur leh SDO leh BDO hna chu kawp lova, MCS Officer atanga dah te an phut tih an sawi bawk. Chawngte SDO Pisa-ah memorundum an thehlut a, an memorandum thehluh te hi August ni 14 hma ngeia a hlawhtlinna an hmuh loh chuan Independence Day boycott chungchang ngaihtuah a ni ang an ti.
Post a Comment