Lawngtlai, August 4, 2022 : Pu T. Zakunga MDC chuan 'sorkar na fawng vuantu MNF party chuan rawih lam a pan mek zel a, sum leh paiah dinhmun tha lo takah sorkar a awm mek a, belh tlak an ni tawh lo a ni' a ti a. Keini ADC mipuite tan chuan BJP hi kan ram leh hnam tana party belhtlak, kan ram dinhmun min la chawikang a, Lairam thar min la kaipuitu tur chu a ni a ti bawk.
Pu T. Zakunga hian nimin khan an party office-ah Lai, Mara, Chakma (LMC) BJP Co-ordination aiawh a, Sixth Schedule Amendment chungchanga Delhi an zinna reports a pe a. Pu T. Zakunag hian Delhi a cham chhung hian MoS for Home (NE) Pu Pramanick, Minority Minister John Barla leh Piyush Goyal Additional Secretary, Ministry of Home Affairs te hmuin inkawmhona hun tha tak an nei.
Pu T. Zakunga, MDC chuan heng an mi hmuh hrang hrangte hnen atang hian an thil thlen chungchangah thu lawmawm tak an dawn thu sawiin, kan thil beisei hi an tih ngei tur thu an sawi nawn leh vek hlawm a. Chuvangin, he thil, kan ram danglamna lo thleng tur hi i nghak hram hram ang u. Vawiin ni thlengin Delhi a kan hotuten min tihsak ngei tur thu min la hrilh a, BJP in a thutiam tawh chu a tih ngei ngei thin thu thlenga min la hriattir hi, a rintlak a, tumah hi beidawng tur kan ni lo, a lo thleng ngei dawn a ni a ti.
He hun hi Pu MC Suiawia, Vice President in a kaihruai a, Pu L. Lawmkima, Adviser in tawngtaina neiin Pu F. Chhannawla, Vice President, Pu Vulmawia, Ex-president leh Pu TT. Nohmung ten thu tawi sawina an nei.
Post a Comment