Rauthla, August 19, 2022 : Vawiinah khan Vanapa Hall-ah Mizoram Sawrkar Flagship Programme - Socio Economic Development Policy hnuaia mimal chhungkua hmasawnna leh an eizawnna tinzawn a eizawnna ngelghet an neihna tur Family Oriented SEDP hawnna programme buatsaih a ni.
Hun kaihruaitu Dy. CM Pu Tawnluia chuan SEDP hi MNF Flagship Programme niin, kum 2018 MLA inthlana mipui hnena kan tlangau pui a ni a, mipuiin SEDP kengkawh turin rorelnaah min hlangkai a ti. MNF Gen. Hqrs chuan Policy & Programme Inplementation Committee a din a, chu chuan SEDP Programme hi a duang chhuak a, MNF High Command-in a pawmpui a, chumi hnuah chuan MNF Flagship Programme-ah hmangin mipui hmaah kan tarlang ta a ni a ti a. Vawiinah a hlawhtlinna kan hmang tan dawn ta hi a lawmawm hle a ni a ti.
He programme-ah hian hmasawnna leh rahbi ni tura ruahman strategy tam tak a awm a, chung zingah chuan ram leh hnam venhim leh humhalh te, leilung hausakna haichhuah leh hman tangkaite, rorelna dik leh langtlang sorkar siamte leh ei leh bara intodelhna tura Mizoram buatsaihte chu a tum bulpui ber a ni a ti.
Chairman SEDP Executive Board Pu Tawnluia chuan kan sorkar tirh, kum 2018 atang khan SEDP hi kan kengkawh chho zel a. Amaherawhchu hripui avangin kum hnih chhung zet chu ke kan pen thei lova, hetih chhung hian a theih ang anga hmalakna kalpui a ni. SEDP Family Oriented hi chhungkaw mal khaichhuahna tura kan tih a ni a, SEDP Family Oriented-ah hian chhungkaw 60000 te tun financial year chhungin tuam chhuah tum a ni a, hei hi MLA Bial tina chhungkua 1500 angin semrual a ni a, chhungkaw khatin tanpuina an hmuh zat tur chu tun sorkar kum chhungin Rs. 50,000 a ni. Tun tum 1st installment-ah hian chhungkaw 60000 hnenah Rs. 25,000 theuh kan pe dawn a, hemi tihfel zawh hian 2nd installment atan Rs. 25,000 theuh pek an ni leh ang. Nakum financial year tharah tuna chhungkaw 60000 ni lo, a dang te pawh pek leh tura ruhamanna siam a ni a ti.
SEDP Executive Board Secretary leh Planning Board Department Secretary ni bawk Pu Lalmalsawma Pachuau chuan Technical report pein, tanpuina sum hi a dawngtu turte bank account-ah diretc-a transfer vek a ni ang. Family Oriented SEDP ah hian crore 350 a awm a, 1st installment atan crore 150 chu Planning Department-ah a awm tawh a, he sum hi department tinah an beneficiary neih zat azirin transfer a ni ang. Vawiin vek khan 1st installement atana sum te department tin te hnenah pek nghal a ni. A dawng turte kokhawmin register-ah an hming sign tir an ni ang a, chumi hnuah an bank account-ah pawisa transfer a ni ang. August 23, 2022 ah tanpuina sum leh a form zawng zawngte hi department lamah zo fel tura beisei a ni a. A cheque chu vawiin khan inhlan a ni. August 22-31, 2022 chhungin District hrang hrangah a hawnna programme buatsaih a ni ang a, September 1 - October 31, 2022 chhungin 1st installment hi pek chhuah hman vek tum a ni. 2nd installment chu December 1, 2022 - February 15, 2023 chhunga pek chhuah hman tum a ni bawk.
Khuallian CM Zoramthanga
chuan SEDP chu kan society, kan social te kan develop chhoh theihna tur target
leh kan sum leh pai leh kan ei leh bar, kan economy kan develop chhoh theihna
tur atana MNF party in tun hma atanga kan policy siam tawh a ni a ti a. Covid
hripui avangin Sawrkarin sum a dawn tur a dawn tak loh, a hloh chu cheng
vaibelchhe 3000 vel a nih thu tarlangin Sawrkarin kum 2022-2023 chhungin Family
Oriented SEDP atan vaibelchhe 300 dah a nih thu a sawi bawk. CM chuan Gas a
ni emaw oil a ni emaw, buhfai te pawh tlachham lutuk lovin kan kal chhuak chho
thei a ni a ti a. SEDP atan hian tun sorkar kum chhungin Rs 50,000 kan ruahman phawt a,
hei hi a bultanna chauh a ni. In khatin a an hmuh turin Nuai 3 hi chu kan
target hrim hrim a ni a ti.
MNF President chuan Opposition in min beihnate hi democracy
tithianghlimtu a ni a, kan welcome a ni a ti a. Finance leh SEDP thuah 'an ti
leh tak tak chuang lovang' tia min beihna te a dik em em laiin, heta tanga kan
talchhuahna tur hi Pathianin min pel zel a ni a ti a. CM chuan MNF party chuan kan
tum chu nghet taka vuan tlat kan ni a, kum 1961 a din tawh kha vawiin thlengin kalphung
thar kan nei lo reng reng a ti a. 'Pathian leh kan ram tan' kan ti a, kan goal-ah
kan kal ngar ngar mai a ni. Kum hnih, kum thum dana kalphung thar hre zing em em
a ni ve lo tih a ti.
SEDP Governing Board Chairman Pu Zoramthanga hian a Ist Instalment atana beneficiary tin te pek tur sum chu a hlawmin Line Department 9 te hnenah a cheque in a hlan a. Agriculture Department chu cheng 23,36,05,500 cheque hlan niin Department hnuaia beneficiary 9161 an awm dawn a; Animal Husbandry & Veterinary Department chu cheng 64,76,74,500 cheque hlan niin Department hnuaiah beneficiary 25,399 an awm dawn a ; Commerce & Industries Department chu cheng 33,82,83,000 cheque hlan niin Department hnuaiah beneficiary 13,266 an awm dawn a; Fisheries Department chu cheng 3,21,55,500 cheque hlan niin cheque hlan niin Department hnuaiah beneficiary 1261 an awm dawn a; Horticulture Department chu cheng 10,39,89,000 cheque hlan niin Department hnuaiah beneficiary 4078 an awm dawn a; Land Resources, Soil & Water Conservation Department chu cheng 14,48,40,000 cheque hlan niin Department hnuaiah beneficiary 5680 an awm dawn a; Sericulture Department chu cheng 76,50,000 cheque hlan niin Department hnuaiah beneficiary 300 an awm dawn a; Tourism Department chu cheng 6,63,000 cheque hlan niin Department hnuaiah beneficiary 26 an awm dawn a leh Urban Development & Poverty Alleviation Department chu cheng 2,11,14,000 cheque cheque hlan niin Department hnuaiah beneficiary 828 an awm dawn a ni.
Beneficiary te Trade thlan dan tlangpui :
Vawk vulh - 16514, Ar vulh - 7072, Vaimim/Bekang - 5619, Eichawp dawr (Grocery/Petty Shop) - 4072, Hmunphiah chin - 3312, Leilet - 2785, Kuhva chin - 2301, Mistiri (Capentry works) - 2116, Puanthui (Tailoring) - 1831, Sangha khawi - 1261
Department hnuaia beneficiary zat :
AH&Vety - 25399, Commerce & Industries - 13266, Agriculture - 9161, LRS&WC - 5680, Horticulture - 4078, Fisheries - 1261, UD & PA - 828, Sericulture - 300, Tourism - 26
District tina Beneficiary zat chu a hnuai ami ang hi a ni :
Aizawl - 18000, Lunglei - 9000, Champhai - 4500, Kolasib - 4500, Lawngtlai - 4500, Mamit - 4500, Saitual - 4500, Serchhip - 4499, Siaha - 3000, Hnahthial - 1500, Khawzawl - 1500
Post a Comment