Rauthla, August 26, 2022 : Vawiin, August 26, 2022 khan kan hma lawka Ngengpuikaia VC bye-election neihna tur atana campaign neiin, Pu Hc. Lalthawmliana, Diltlang South bialtu MDC chuan Ngengpuikaiah hun a hmang. 

Bialtu MDC Pu Hc. Lalthawmliana chuan Ngengpuikai khua hi Congress chakna khua a ni a, MDC inthlanah pawh khan pathumna ka ni. Amaherawhchu, tunhnaiah MNF a thang nasa a, mipuiin State leh LADC ah MNF sorkar chak takin a ding tih an hria a, chhungkaw tam tak MNF ah an lo lut mek a. A fing apiangin ruling nih hlutzia an hria a. MNF chaklohna khua hi MNF chakna khuaah kan siam dawn a ti.

Mipui ten hlawkna awm lo an bawh peih lo, a sorkar apiang an bawh ṭhin. Tunah hian Congress dinhmun a chhe em em a. Central-ah Congress an sorkar loh chuan Mizoramah Congress an sorkar ngai lo. LADC ah MDC pakhat an nei ṭawk a, Mizoramah leh LADC a Congress sorkar leh tur chuan hun a duh rei dawn a ti a. Ni chhuah tawh hnua inthlang tur kan nih avangin tun tum inthlan tur hi awlsam a ni. Congress nih hi a zahthlak, KS nih ai pawhin a zahthlak. An tan sorkarna chance awm lo. Engvanginnge Congress kan hnawl, Kohhran duh loh zu an zawrh vang a ni. MNF party a awm erawh chu a changkang a, kristian ni bawk tan phei chuan a nuam a ni a ti a. ZPM party chu lungawilo kalkhawm din chawp an ni a, innghahna an nei lo a ni a ti.

Pu Hc. Lalthawmliana chuan, Sorkarin kan tana hma a lakna zawng zawng hi hmuhhmaih chi a ni lova. Tunah pawh hian he khua tan hian sorkarin hmachhawp a nei mek a. Ngengpuikai khuaa in hmun nei lo te tan in hmun kan pe dawn. Health Clinic nei turin kan nawr a, tunah hian sorkarin a approve vek tawh. Hun reilote ah Health Sub-Centre puitling a function dawn. Sangha dila eizawnna ngelnghet a awm theih nan sorkarin hma a la dawn a ti. PMJVK hnuaiah tuidah khawlna, hriselna lam tihchangtlunna leh zirna lam tihhlawhtlin nan project kan theh lut a, a hlawhtlinna hmuh pawh kan beisei a ti bawk.

He hun hmanpuitu Sangau South bialtu MDC Pu JB Vanhoy chuan, MNF chu Pathian leh kan ram tan titu kan ni a. Kan Sorkar chhungin buaina kan tawk a, sorkar hmasaah mau tam kan tuar a, tun sorkarah Covid-19 hri vangin harsatna kan tawk a, ramri buai leh raltlan avang tein hmalak theih loh te pawh kan nei. Opposition ho ten Treasury khar a ni a, engmah an tithei lovang an ti a, mahse tunah hian sorkar hian chak takin hmalam a pan mek a, kan tum tihhlawhtling turin hmalam kan pan mek zel a ti a. Bial tana LADC pela project siam ngam, a hlawh pawh bial tana hmang ngam, fund pawh za za bial tana hmang ngam bialtu MDC in nei hi in vannei hle a ni a ti bawk.

He hun hmanpuitu Pu Andrew Laltlanzara, Chawngte P bialtu MDC chuan, Mizoram leh LADC ah MNF kan sorkar mek a, MNF sorkar hian hlawh pek theih loh leh harsatna lian tham kan tawk lo. Opposition ho chuan thilho teah kan hming tihchhiat an tum mek a, mahse kan zam lova, hmalam panin kan kal zel dawn a ti a. Sorkar lai thawhpui thei vote mai hi a finthlak a, khawtlang tan pawh hmasawnna a ni a ti.

Ngengpuikaiah hian VC member 5 awmin, Congress VC 2 leh MNF VC 3 awmin, MNF VC pakhat a boral avangin inthlanthatna hi September 6, 2022 ah neih a ni ang.

Post a Comment

Powered by Blogger.