Sangau, August 02, 2022 : Nimin khan MLA Lawngtlai East Cup, 2022 Sangau Zone qualifying tournament chu Sangau-I khelmualah Sangau Zone Football Association te buatsaihin khelh tan a ni a. He hun ah hian Lawngtlai District Football Association hruaitute'n hun an hman pui.
Sangau Zone FA President Pu K. Ramlianthanga'n inkhelh hmaa inkhawm tawi kaihruaiin MLA Lawngtlai East Cup 2022 khelh tan a ni thei dawn chu lawmawm a tih thu a sawi a ni.
He hun hmanpuitu Lawngtlai District Football Association Sr. Vice President Pu Elvis Lalthangzuala chuan, Lawngtlai East Bialtu MLA Pu H. Biakzaua'n a bial chhung thalai Infiammite hmakhua ngai a, football tournament min buatsaih sak hi a lawmawm hle a. Bialtu MLA in min buatsaih sakna rilru hre reng a, football a hmsawnna duhawm tak kan chan ngei theihna turin theihtawp kan chhuah a tul a ni, a ti a. Kan sorkar in Sports chu Industry-ah a puang tawh a, hei hi hre reng a, Infiamna chu eizawnna tlak a nih zia pholang tura theihtawp kan chhuah a hun tawh a. Mi taima te tan chauh hlawhtlinna hi a awm a ni, a ti bawk.
Lawngtlai East MLA Cup 2022 hi Zone thum-ah qualifying round neih a ni a. Sangau leh Bualpui Zone atanga Finalist leh Lawngtlai Central zone atanga VC team Pali ten Final round hi Ni 23.08.2022 hian CYLA playground ah an khel dawn a ni.
Nimina Sangau Zone qualifying tournament-ah hian Village Council pakua an tel thei a. Match hmasa ber ah Lungtian-I in Cheural VC team te chu 4-1 in an hneh a, Pangkhua leh Thaltlang VC team te 2-2 an in draw ve thung a ni. He tournament hi Leaque match a khelh tur a ni ang.
Sangau Zone FA ten buatsaih tournament hi LDFA hruaitute Sr.Vice President Pu Elvis Lalthangzuala, Vice President Pu S. Lalrinsiama, Hon. Secretary Pu Edwin Lalhuliana leh Pu F. Ramdinsanga, LDFA Executive Committee member ten an telpui a ni.
Post a Comment