Rauthla, August 4, 2022 : Joint. Village Council Sangau enkawl lai Ambulance, Sangau khawtlang tana bialtu MLA Pu H. Biakzaua'n pekah August 2, 2022 khan S. Lungpherah No.4 hawng 14 leh a neitu K. Lallungkhama te chu man a ni a, hemi chungchangah hian Social Media thenkhatah Ambulance enkawltu ten an duh duha hman theihin ruahmanna an siam chu thil pawi tak a ni tih leh a petu Pu H. Biakzaua an timualpho hle a ni tiin leh Ambulance a nihnaa a enkawltu ten advantage an la a ni tih thu an thehdarh nasa hle.
Hemi chungchangah hian Jt. VC Sangau chuan vawiin khan thuchhuah siamin, an Ambulance enkawl lai hi August 2, 2022 ah Siaha lamah a kal tih an hriatpui loh thu leh driver H. Zoenga’n engmah a hriattir loh thu an sawi. He thil hi S. Lungphera he Ambulance a chuang K. Lallungkhama hnen atanga No.4 man a nih thuthang atanga an hriat ve chauh thu an sawi. He thil thleng hi pawi an tih thu leh an hriat pui lohva an driver chhawr laiin Ambulance a lo service pui chungchangah leh an fimkhur tawk lohnaah hriatthiamna an ngen bawk.
Thuchhuaha tarlan a nih danin, Pu H. Biakzaua’n Sangau mipuite mamawhna hriaa Ambulance a pek hi Jt. VC Sangau President F. Rozuala chuan enkawlin, mawhphurhna a la a, driver hlawh leh motor maintain-na sum pawh hi an tum vek a ni a, Ambulance hmanna rate te siamin, a hmang tur te hian Jt. VC Sangau President emaw driver an be mai thin a, chutiang chuan a tlan chhuak thin.
Jt. VC Sangau President F. Rozuala sawi danin, damdawi man na Ambulance hi Lawngtlai Police kutah a awm mek a, Court-in hemi chungchang a chinfel hun an nghak tih a sawi bawk.
Post a Comment