Rauthla, August 17, 2022 : Chief minister bial (Aizawl East-I) chhung a awm, Zemabawk Local Council chu member thenkhatin an awmna party an chhuahsan avanga sawrkarna siam thei an awm tak loh avangin nimin atangin thiah (dissolved) a ni.
Notification a tarlan a nih danin, Zemabawk LC member thenkhatin an awmna party an chhuahsan avanga sawrkarna siam thei an awm tawh loh thu Zemabawk LC secretary hnen atangin ziaka dawn a ni a, thil awm dan chhui chian a nih hnuah LC secretary thu thlen chu thil dik a ni tih fianfiah a ni. Dan in a sawi angin, tuna LC secretary ni lai Kalvari Tlangmawia chu, a aiawhtu tur midang ruat a nih hma, secretary mawhphurhna chelh zui tura tih a ni.
Zemabawk LC member 7 awmna ah kum 2020 inthlan ah MNF in seat 5 an la a, an zinga pakhat chu AMC inthlan ah a tlin avangin, kum 2021 kumtawp lam ah bye election neih a ni. Chutah chuan ZPM ticket a ding a tling. Tunhnai khan MNF LC member pakhat leh congress LC member pakhatin an party a chhuahsan a, hemi vang hian tun a Zemabawk LC dinhmun chu; MNF 3, INC 1, ZPM 1 an ni a, an party chhuahsan LC member 2 an la awm bawk.
Municipal Commissioner, Zothanmawian nimin ah 'Notification' tichhuakin, danin a sawi angin Zemabawk LC chu notification chhuah ni atangin thiah (dissolved) a ni a, hei hian Zemabawk LC thar siam tura inthlanna neih a nih hma a huam ang.
Post a Comment