Lawngtlai, July 06, 2022 : Vawiin khan YLA Lawngtlai Vengpui Branch te buatsaihin an veng chhunga rawlthar/tleirawl leh naupang, kum 12-20 inkarte hnenah resource person hrang hrang kaltlangin an mamawh hrang hrang zirtirna pek an ni.
Pu Hc. Lalramhmachhuana, Branch YLA Treasurer kaihhruai inzirtirna programme hi LIKBK Bethel Kohhran Hall-ah neih a ni a, Lawngtlai Vengpui Area huam chhung bakah veng pawn atangin mi 183 an kalkhawm a. Inzirtirna programme bakah hian Branch YLA member zirnaa titha mi 14 hnenah chawimawina hlan a ni bawk.
Vawiin Tleirawl/Rawlthar leh Naupangte hnena inzirtirna programme-ah hian Traffic Rules chungchangte, Ruihhlo that loh zia chungchangte, Nungchang mawi leh tha chungchangte leh Khawtlanga Tleirawlte mawhphurhna chungchangte zir niin, Resource Person atan Pu C. Lalruatkima, Addl. SP, Lawngtlai, Pu Joseph L. Pachuau, MVI Lawngtlai, Pi Lalrammuani, Asso. Professor, Gov't Lawngtlai College bakah Pu V. Lalengvara, Branch YLA Vice President te hman an ni.
Vawiin Programme hi Central YLA Gen. Secretary Pu Joseph Lalhmingthanga Chinzah in hmanpuiin, thusawina hun a hman bakah programme senso atan ₹.3,000 a hlan.
Post a Comment