Rauthla, July 23, 2022 : India President 15-na atana thlan Draupadi Murmu chu thawhtanni, July 25, 2022 hian parliament Central Hall-ah rinawmna thu tiam tira lakluh a ni dawn. Tarlan tawh angin NDA candidate kum 64 mi, Pi Murmu-i hian President inthlan neih zawh takah khan Opposition nominee Yashwant Sinha hnehin tribal zinga President hmasa ber atan thlan a ni.

Department of Personnel and Training chuan thupek chhuahin President lakluh ni hian sawrkar laipui hnuaia office thenkhat chu khar a ni dawn a. Parliament building thar sak mek pawh chawlh lailawk a ni dawn a. Thupeka tarlan anih danin thawhtanni zing dar ruk atangin lakluh inkhawm zawh hma chu tluang taka ruahmanna a kal theih nan office 30 chu khar a ni ang.

President thar lakluh anih hma hian President kalchhuak tur Ram Nath Kovind-a chu vawiin tlai khan Central hall-ah thlahna hun hman a ni a. Pu Kovind-a hian naktuk hian ram mipuite hmaah thlahna thuchah a sawi ang. 

Draupadi Murmu hian kum 1997 khan BJP a zawm a, Rairangpur Nagar Panchayat councilor atan thlan a ni a. Kum 2000 ah Rairangpur Nagar Panchayat Chairperson niin, National Vice-President, BJP Scheduled Tribes Morcha hna a chelh bawk.

Odisha state-a BJP leh Biju Janata Dal thawhdunna sorkar hnuaiah nihna hrang hrang chelhin, March 6, 2000 - August 6, 2000 chhung khan Commerce and Transportation Minister a ni a, August 6, 2002 - May 16, 2004 chhungin Fisheries and Animal Resources Development Minister a ni bawk. May 18, 2015 khan Jharkhand Governor atan lakluh a ni bawk.

Draupadi Murmu hi a pasalin kum 2004 khan a boral san a, a fapa pahihte pawh boral tawhin, tunah hian a fanu Itishri Murmu nen an cheng mek a ni.

Post a Comment

Powered by Blogger.