Foster Care leh Adoption hi mi thenkhat chuan kan hre theuhin a rinawm. Chutih rual chuan mi tam zawk erawh chuanin kan hre chiang tawk lo thei bawk. Foster Care leh Adoption hi lo ralkhat hriat satliah theih a nih avangin ani lo zawnga hriat leh ngaihdan siam sual a hlauhawm em em a. Chuvangin, midangte tana malsawmna thlen thei hmanraw pawimawh tak anih avangin mitin hian kan hriat chian a kan zir chian a ngai tawh takzet a ni.
Ahmasa berin ‘Foster Care’ chu engnge ni?: Foster Care kan tih hian naupangin tha taka enkawltu tur chhungkua a neih loh emaw, nu leh pa ten harsatna an tawh avanga an fa, enkawlna tha tak an pek theih loh, dan ang thlapa hun engemaw ti chhung midangin an lo enkawl/awmpui lailawk hi a ni.
Naupang tam tak an nu leh pa ten harsatna lian tham tak an tawh avang emaw nu leh pa ten an boral san tak avanga chenna hmun nei lo leh zirna kawng pawh zawh tha mumal thei lo a hmabak thim tak hmang mek hi tunlai khawvelah an tam tawh em em a. Chung naupangte tan chuan mi thahnemngai thenkhat ten luanchhuahna rilru pu a, dan mumal tak zawm chungin naupang chu an lo awmpui/enkawl lailawk thin a ni. Naupang an awmpui/enkawl lailawkte chu kum sawmpariat an tlin hma loh emaw naupangin a mamawh dan azirin emaw enkawl hun chhung an bituk sak thin a. An enkawl chhung hian zirna lam emaw naupangin a thiambik thil a neihte chu haichhuah sakin an lo pui a, an lo puitlin hunah pawh tha taka an inenkawl chhunzawm theih nan tiin a enkawltu ten an mamawhte lo phuhruk sakin puih an ngaihna kawng hranghrangah an lo pui thin a ni.
Naupang awmpui/enkawl lailawk theihte chu thisen zawmpui emaw thisen zawmpui kher lo, a nu emaw a pain a boralsan takte leh nu leh pain harsatna a tawh avanga a enkawl chhunzawm theih lohte an ni. Foster Care-in a tum ber chu enkawltu tha leh mumal nei lo naupang, chhungkaw awmzia hriattir a ni a. A awmna tur chhungkuate paw’n Foster Care-in a tum ber an hriat leh tihhlawhtlin chu naupangin hma hun engtak a neih phahna tur leh a than chhohna kawng a tanpuitu pawimawh tak a nih theih avangin a pawimawh hle.
Adoption lam han bihchiang leh ila : Adoption kan lo hmelhriat dan leh hmuh dan te a lo dik reng em? Adoption kan hmuh dan lehhriat dan dik tawk loh avang hian fa latu leh an fa laka te chungah harsatna tam tak thleng thei a awm a. Naupang chu fa lak a niha vanga danglam bik tur anga ngaihna a awm thin avangin fa lak duh tam takin an lak loh phah hial thin. Chumai piah lamah kan thenawm khawvengte mitmei kan ven lutuk luat leh an sawisel kan hlauh avangin fa lak duh viau chung siin kan hreh ru tlat thin.
Chungtiang bawk chuan tute emaw veng chhung leh kan bulhnaia mifa la an awmin sawizui emaw, en dan danglam deuh emaw kan lo nei ve fo thin a. Thenawm hmaikhap loh avanga fa lak duh rilru pute paw’n an lak duh loh phah hial thin a ni. Hei hi Adoption kan hriat chian tawk loh vang pakhat a ni. Naupang enkawltu neilo fa atana dan ang thlapa kan lak hian naupang chuan chhungkaw thar, nu leh pa, unau thar neiin, atan khawvel inthlak danglamin, hma bak thim tak nei khan hmabak eng duhawm tak a lo neih phah a. Chhungkaw nei lo khan chhungkua a lo neih phah bawk thin.
Chuvang chuan adoption hi midang tana malsawmna thlentu hmanraw ropui tak leh pawimawh tak a ni kan ti thei hial awm e. Naupang enkawltu neilo tam tak khawvelah hian awmin Mizoram chhungah ngei pawh hian chhungkaw thar, nu leh pa, mamawh naupang tam tak an awm a. Amaherawhchu aadopt-tu tur nu leh pa te hi kan tam lo em em thung si a ni.
Naupang enkawltu neilo tam takte hi kan Mizo pui ngeite paw’n an adopt ve thin nachungin, Mizoram pawn mai bakah India ram pawn atanga rawn adopt hi an thahnem thin hle a, a tam zawk an ni ang te pawh ti ila kan sawi sual awm love.
Adoption kalphung han thailang leh lawk ila : Mitu pawh fa la duh te chuan Sawrkar hriatpuina ngeia in register tur a ni a.Chumai bakah, fa la duh ten fa lak chungchangah thuthlukna mumal tak an siamtheih na’n fa lak leh a kaihhnawih zawngzawngte hrilhhriat niin, an lo inbuatsaih lawk theih na’n fa an lak hmain Counselling an dawng hmasa tur a ni. An in register-na pawm a nih hnuah, fa la duhte chu fa la tlak an nih leh nih loh enfiah leh zirchianna neih thin a ni.
A tawpberah chuan naupang midangin a an lo awmpui/enkawl lailawk (Foster Care) leh dan anga fa lak (Legal Adoption)hi mi thenkhat chuan dan mumal tak zawmin an kalpui a. Amaherawhchu mi thenkhat erawh chuan mahni remhriatna leh insiamremna hmangin an kalpui thin. Dan ang thlapa kal pui lo te hian a hnuah harsatna tawkin Court-ah te an in khin phahfo thin a. Hei vang hian fa kan la duh emaw kan awmpui lailawk duh emaw a nih chuan dan mumal tak zawm a, dan ang ngeia fa lak (Legal Adoption) leh dan hriatpuina ngeia naupang awmpui/enkawl lailawk (Foster Care) chu kan tih ngei ngei tur a ni tih hria ila. Mahni remhriatna leh tha nia kan hriat anga nga ti mai lovin, dan mumal leh felfai zawk zawm chu kan tihmakmawh leh a hnuzela buaina thleng thei laka kan fihlim theihna a ni tih kan hriat tlan theuh a tha awm e.
Adoption leh Foster Care chungchang hre chiang duh tan District tinah District Child Protection Unit a awm a, engtiklai paw’n a zawh fiah theih reng a ni.
Issued by: District Child Protection Unit, Lawngtlai District
Post a Comment