Lawngtlai, July 22, 2022 : Mizoram Rural Bank in Corporate Social Responsibility (CSR) atanga LADC hnena an pek, Truck Mounted Suction Machine (Ek paihna) chu vawiin khan LADC Conference Hall-ah Pu Josehp Lalremruata, Chief Manager, MRB Lawngtlaiah kaihhruaina hnuaiah Pu Samuel L Warbah, General Manager, MRB in Pu V. Zirsanga, CEM LADC hnenah a hlan.
Pu Samuel Warbah chuan MRB in sum peipun ringawt an tum loh thu leh mipuite hmasawnna leh hamthatna tur ngaihtuahin hma an la thin tih a sawi a. Hun reiloteah Lawngtlai District in kawngpui tha tak neiin, hmasawnna ropui tak a hmuh ngei a beisei thu a sawi.
Pu V. Zirsanga, CEM LADC chuan MRB in CRS kaltlanga LADC leh mipui mamawh em em Ek Paihna motor an pek avangin lawmthu a sawi a. 'Lawngtlai mipui ten tangkai takin kan hmang dawn a, thianghlimna kawngah pawh hma kan sawn phah ngei ang' a ti.
CEM chuan Lawngtlai District mipuite chu chhawmdawl ngai leh tih hmasawnna ngai kan nih thu a sawi a. Lawngtlai District-a Bank leh Company awm te pawh district hmasawnna kawngah theihtawp chhuah pui turin a ngen bawk.
He Ek paihna motor hi Mahindra Company siam a ni a, tanky litre 1500 dawng niin, a pump khawl hian darkar khatah 350cum a pump thei a ni.
Vawiin hun hmannaah hian MRB Chandmary ten Model Village atan a an puan Paithar hnenah Pick-up truck an hlan nghal a. Paithar khaw aiawhin Pu Lalrinthanga, VCP in a dawng.
Mizoram Rural Bank hi Mizoram tana Bank din niin, tun dinhmunah hian Branch 100 a nei mek a. Thingtlang kilkhawr ber bera awmte pawhin Bank awlsam taka an dawr theihna turin theihtawp a chhuah mek a. Customer Service Point 236 a nei bawk. MRB kaltlang hian PM Schemes hrang hrang PMJJBY, PMSBY leh APY te tih theih reng a ni a. Loneitute, kuthnawktute bakah sawrkar hnathawkte tan pawh loan a pe chhuak mek reng a ni.
Post a Comment