Lawngtlai Bawrhsapin Lawngtlai leh Kawlchaw 'W' inkara National Highway kawngpui zauh hna thawh mek a tlawh; Ram leilung tichhe lo thei ang ber tura ruahmanna awm sa anga leivung paih turin hna thawktute chu a hrilh a ni

Rauthla, July 23, 2022 : Lawngtlai Bawrhsap Pu Amol Srivastava chuan Lawngtlai leh Kawlchaw 'W' inkar National Highway kawngpui chu chhim lam tana kawngpui pawimawh tak a nih angin hna thawh dan tur hun bi tuk sa leh a hmelhmang ruahman sa mila a ṭha thei ang ber leh a chak thei ang bera hna thawk turin he hna enkawltu National Highway Infrastructure Development Limited (NHIDCL) hotute, hna viltu Intercontinental Consultants and Technocrats Pvt. Ltd (ICT) leh hna thawktu Power Mech Projects Ltd (PMPL) te a hrilh.

Lawngtlai Bawrhsap Pu Amol Srivastava chuan vawiin khan Lawngtlai leh Kawlchaw 'W' inkar National Highway kawngpui laih zau hna thawh mek chu a hmunah kalin a enfiah a. Hna enkawltu leh hna thawktute nen hma lak zui zel dan tur an sawi hoin, Bawrhsap hian kawng laihna leivung paihin ram leilung, lui dung leh ramngaw a tihchhiat loh nana leivung paihna tur hmun (spoil bank) an ruahman dan leh kawng laihna leivung an paih dan te enfiahin, ram leilung tichhe lo thei ang ber tura ruahmanna awm sa anga leivung paih turin hna thawktute chu a hrilh a ni.

Lawngtlai Bawrhsap hian leivung paih dan a enfiah bakah hian kawngpui zauh hna thawh chungchanga hna thawktute'n harsatna an tawh hrang hrang chin fel dan tur a sawipui nghal bawk.

Lawngtlai Bawrhsap Pu Amol Srivastava hi Additional Deputy Commissioner Pu James Miahlung leh District Information & Public Relations Officer Pu C. Lalhruaitluanga te'n ṭawiawmin, Lawngtlai College Venga 71 RCC aṭanga Kawlchaw 'W' thlengin kawngpui zauh hna thawh mek chu an en.

National Highway-54 kawngpui zauh hna thawh mek hi package riatah ṭhen niin, Lawngtlai College Venga 71 RCC aṭanga Siaha District chhunga Zero (Maubawk) thleng hi Package-7 a ni a. NHIDCL enkawlna hnuaiah PMPL te'n he hna hi an thawk a. Lawngtlai District huam chinah, 71 RCC leh Kawlchaw 'W' inkarah hian leivung paihna (spoil bank) ruahman sa 5 awmin, ram neitute nena inbiak remna anga leivung chhun khahna hmun (dumping area) 8 a awm bawk. NH-54 zauh hna Package-7 hi April 2024-ah zawh tura ruahman a ni.