Lawngtlai, July 12, 2022 : Tun hnaiah Mizoram chhung District hrang hrangah Covid-19 hrikai hmuhchhuah a pung leh mek a, July thla kan hman mek chhungin Covid-19 hrikai thar mi 878 hmuhchhuah an ni a, mitthi 3 an awm bawk. Hetih lai hian Lawngtlai District-ah chuan thawktu awm loh avangin Covid-19 test theih a ni lo.

Dr. LP Malsawma, CMO Lawngtlai chuan July 5, 2022 atang khan Covid-19 test an kalpui chu an chawlhsan tih a sawi a, hei hi a chhan chu sorkarin thawktute a chawlht tir vang a ni a ti. Tun dinhmunah hian Lawngtlai District-ah Covid-19 hrikai an awm loh thu a sawi a. Hman ni khan South Lungpherah hrikai a awm a, tunah chuan a dam leh tawh a ti.

Tun hnaia hrileng thar leh chungchang an sawiho thu leh District in hma an lak mekna sawiin, damlo na zual an awmin DCHC ah dahna turin ruahmanna an siam tih a sawi a, mahse, hetah pawh hian thawktu an awm loh avangin Aizawl lama refer mai turin ruahmanna siam a ni a ti.

Dr. LP Malsawma chuan testing centre kalpui turin Laboratory Technician leh thawktu dang pe turin thuneitu lamah ngenna a siam thu a sawi a, hei hi chhanna a la hmuh loh thu a sawi bawk. 

Post a Comment

Powered by Blogger.