Rauthla, July 13, 2022 : Congress Thalai (MPYCC) chuan nimin khan Excise & Narcotics Department Minister Dr. K. Beichhua hmuin, Pi Lalhriatpuii (L) chhungte hnenah zangnadawmna cheng Nuai 100 pe ngei turin an phut tih lehkha an pe a, an pe lo a nih chuan a tul angin hma an la dawn tih an hriattir.
Congress Thalaiin nimina thuchhuah an siamah, Pi Lalhriatpuii (L) Dawrpui Vengthar grape wine zawrhlai chu May 27, 2022 khan Excise Department-in in mansak vek a, tunah pawh engmah pek let a la ni lova. Chhungkaw eizawngtu ber a nih angin a eizawnna ve ber grape wine a zawrh theih tak si loh avangin a mangang leh a rilru a hah em avangin a nunna a chan tih an sawi. MPYCC chuan, "A runthlak kan tiin a na kan ti hle a ni," an ti.
Congress Thalai chuan July ni 13, 2022 chhun dar 12:00 hma ngeiin Mizoram sorkarin Pi Lalhriatpuii (L) chhungte hnenah zangnadawmna cheng Nuai 100 pe ngei turin Mizoram sorkar chu an phut tih an sawi a, an pe lo a nih chuan a tul angin hma an la ang tih Excise & Narcotics Department Minister Dr. K. Beichhua chu an hriattir bawk a ni.
Post a Comment