Aizawl, June 14, 2022 : Vawiin khan Aijal Club-a World Blood Donor’s Day hman a ni a, he hun hi Health Minister Dr R. Lalthangliana chuan a hmanpui.
Dr R. Lalthangliana chuan mihring dam chhung tawi te ah midangte tana inpekna tluka hlu leh ropui a awm lo, a ti a. Mahni mihringpuite hmangaihna, mi dangte lainatna leh duhsakna lanchhuahna pawimawh ber te zinga mi chu mamawhtute tana a thlawna thisen pek voluntary blood donation hi a ni, a ti. Health Minister chuan mahni tana hlawkna um lova damlo mangangte tana an din tlat avangin a thlawna thisen petute a fak a. Association for Voluntary Blood Donation (ABVD) te hmalakna ropui a tih thu sawiin a thlawna thisen pekin 100% a kai theih nan tan la chhunzawm zel turin a fuih a ni.
Vawiin programme ah hian Voluntary Blood Donation Award 2022 sem a ni a. Religious category ah Central KTP pakhatna niin TKP Coordination Committee, Aizawl leh PYD, North East India ten an dawt a. YMA Category ah Chanmari West Branch pakhatna, Bethlehem Vengthlang leh Aibawk Branch te pahnih leh pathumna an ni a. College zingah Pachhunga University College NSS ten lawmman pakhatna dawngin Hrangbana College leh Aizawl College NSS ve ve te chuan pahnih leh pathumna an dawng a. Higher Secondary School ah Synod HSS NSS te pakhatna, Helen Lowry HSS NSS te pahnihna niin Govt Cengral HSS NSS te pathumna an ni a. Miscellaneos Category ah MNYF, Mizo Chelsea Suppporters Club, 225 CRPF Zemabawk ten pakhatna atanga pathumna lawmman an la. A pumpuia ti tha Overall Special Award ah Central KTP in lawmman pakhatna lain Mizoram NSS leh Central YMA ten pahnihna leh pathumna an la a ni.
Mizoram chhungah vawi 50 chuang thisen pe tawh mi 27 an awm a. Thisen pe hnem ber te chu Pu C.Lalremruata Electric Veng leh Pu RC Rokhuma Mission Veng te niin tum 83 ve ve an pe tawh a ni.
Kum 2021-2022 chhungin thisen pek/lakkhawm zawng zawng hi 28191 a ni a, a thlawna thisen pek hi 25396 a ni bawk. Hemi hun chhung hian blood donation camp vawi 480 neih a ni bawk. Thisen pek/lakkhawm leh a thlawna thisen pek zat hian kum 2019-2020 a ami a phak lova. Blood donation camp hian kum kalta leh kum 2019-2020 a mi a phak lo bawk.
Post a Comment