Lawngtlai, June 16, 2022 : National Student’s Union of India (Mz) Lawngtlai District ten thu dik tawk lo hmanga LADC Education & Human Resources Department (PS)-in Primary School Teachers Competitive Exam a buatsaihah thil fel lo a awm nia thuchhuah an siam chu Exam conduct-tu LADC Education Department leh Invigilator te puh hmingchhiat tumna leh tihmualpho tumnaah an ngai tih Primary Teachers Association Gen. Hqrs; Lawngtlai chuan nimin khan thuchhuah siamin an sawi a, thil awmdan an sawifiah nghal.

PSTA Gen. Hqrs; Lawngtlai chuan Observer leh Superintendent atangin Invigilator-te chu Briefing felfai tak pek vek an nih thute, exam chu felfai leh zahawm taka conduct a nih thu an sawi.

Exam Hall-ah phone kenglut an awm an hriat loh thu leh phone khawih an hmuh loh thu sawiin, Invigilator ten candidate te exam Hall-a an luh hmain an phone an lakkhawm thu leh hmun khata an dah tir vek thu an sawi.

PSTA Gen. Hqrs; Lawngtlai chuan Exam beitu ten dik taka exam am hmachhawn theih nan leh tluang taka exam zawh fel a nih theih nan theihtawp an chhuah thu leh entawn, inhrilh pawh an phal loh thu an sawi a, Question hrethiam lo an awm chuan Invigilator ten an mawhphurhna a nih angin hrilhfiah thin an ni tih an sawi bawk. 

PSTA chuan Question Paper-te chu official ten Strong Room atanga an lakchhuah hnuah Official leh Invigilator-te hmuh laiin an hawng a, hei hi video-a record-in, kawl that a ni an ti a. Invigilator-te chuan exam beitute chu tumah an hrilh lova, an puih bawk lo tih an sawi.

PSTA Gen. Hqrs; Lawngtlai chuan PSTA atanga Invigilator atana ruat ten Exam beitu ten dik taka exam am hmachhawn theih nan leh zahawm taka exam conduct a nih theih nan leh tluang taka exam zawh fel a nih theih nan theihtawp a, an duty an hlen niah an inngai tih an sawi a, hemi piah lam thil a lo awm a nih chuan an hmuh phak loh leh an hriat loh thil a ni ang tih an sawi. 

LADC Education & Human Resources Department (PS) leh Invigilator te puh hmingchhiat tumna leh tihmualpho tumna ni awma NSUI (Mz) Lawngtlai District ten thuchhuah hial an siam chu pawi an tih thu an sawi a, tun hnuah thleng tawh lo se an duh thu an sawi bawk. 

Post a Comment

Powered by Blogger.