Lawngtlai, June 23, 2022 : Nimin khan MJA Lawngtlai District te chuan Lairam Christian Medical Centre & Hospital, Lawngtlai te nen thawhhona thuthlung an lo ziah tawh angin Family Declaration form chu LCMC & H Manager Pu V. Lailiankima hnenah an thehlut.
Pu Lalngeta Ralte, MJA President Lawngtlai District chuan LCMC & H te nen thawhhona thuthlung ziah chhunzawm a Family Declaration an thehlut leh thei chu lawmawm a tih thu a sawi a. LCMC & H te nen kum khat chhung an thawhhona avanga MJA ten Hospital atanga hamthatna hrang hrang an hmu thei te, medical lam te nen inpawh taka hma an lak thin tawhna chu lawmawm a tih thu a sawi lang bawk a ni.
Pu V. Lailiankima Manager pawhin MJA ten Hospital news hrang hrang te mipui hriat a puanzar ani thin chu lawmawm a tih thu leh an hmalakna hrang hrang te a sawi lang bawk a. LCMC & H ten Oxygen plant an neih thu te, ICU khum pathum awmna tur Building sak mek anih thu te leh thisen test chi hrang hrang Aizawl a an thawn thin chu tunah chuan thawn ngai tawh lovin Hospital in an test theih tawh thu te a sawi lang a. Tin, mi thahnemngaite hnen atanga Poor patient fund an dawng thin chu lawmawm a tih thu leh Chung an thil dawn te chu tangkai taka hman anih thu a sawi lang bawk a. LCMC & H hian Rescue centre leh Motherless Home a awm te chu an thlawn vek a an enkawl thu pawh a tarlang bawk a ni.
Post a Comment