Lawngtlai, June 16, 2022 : Mizoram Journalists' Association (MJA), Lawngtlai District chuan Lawngtlai District Rural Development Agency-a Project Director Pi Marilyn Rualzakhumthangi hovin nimin khan Green MJA Day (vawi 7-na) an hmang.
Green MJA Day puala inkhawm Lawngtlai Press Club-a neihah Pi Marilyn Rualzakhumthangi chuan Lawngtlai District MJA ten mi dangte kawng dika hruai tura chanchinbu kal tlanga ziah mai duh tawk lo va, a taka an che chhuak tel thin chu lawmawm a tih thu a sawi a. ‘Lawngtlai District-ah hmasawnna hna thawh vangin ramngaw, thing leh mau a chereu nasa hle a, theih tawp chhuaha thing phun belh leh enkawl zui kawngah tan lak sauh sauh a ngai a ni’ a ti.
Inkhawm tawi hi hi District MJA Treasurer Pu H. Lalrinmawia chuan kaihruaiin, District MJA President Pu Lalngheta Ralte pawhin Green MJA Day thuchah a sawi bawk.
Lawngtlai District MJA te hian UD&PA Department-in faina lama a thawh hlawk avanga Swachhta Warrior lawmman an hlan, Lawngtlai District MJA Vice President Pu Elvis Lalthangzuala chu chawimawina thuziak leh tangkafai an hlan. Swachhta Warrior Pu Elvis Lalthangzuala chuan ‘faina chu chhungkuaah bul ?an a, naupang thinlungah tuh ngheh hmasak a pawimawh a, chuta tang chuan faina tluantling nei tura hma lakna chuan awmzia a nei thei dawn a ni’ a ti.
Lawngtlai Press Club-a hun hman zawh hian Khuallian Pi Marilyn Rualzakhumthangi hovin District MJA te chuan DRDA Office bulah thing tiak phunin, tha takin an hung nghal a. Nimina Green MJA Day hun hmannaah hian Lawngtlai DIPRO Pu C. Lalhruaitluanga pawhin a telpui a ni.
Mizoram Journalists' Association (MJA), Lawngtlai District te hian kum 20216 atang khan kum tin Green MJA Day hi an hmang thin a ni.
Post a Comment