Lawngtlai, June 10, 2022 : Vawiin khan Lawngtlaiah Green Mizoram Day hman a ni a, He ni pual hian Lawngtlaia sawrkar department hrang hrang, zirna in, District MJA leh CYLA te chuan Kaladan Multi Modal Transit Transport Project (KMMTTP) kawngpui sir, Lawngtlai aṭanga kilometre 9 vela hlaah thing tiak 350 an phun.

Lawngtlai Bawrhsap pisa tualah a hawnna inkhawm buatsaih niin, Lai Autonomous District Council (LADC)-a Chief Executive Member charge la mektu Pu Lallawmsanga Apetow (EM i/c RD, PWD & AH&Vety) chu khuallian a ni a. Khuallian chuan, Green Mizoram Day-in a tum ber chu Mizorama thing leh mau chereu lam pan mek siam ṭhat lehna hna thawh a nih angin Lawngtlai District-ah pawh tun hma aia ramngaw humhalh leh thing phun kawnga uar lehzuala hma lak a ṭul a ni, a ti a. Ramngaw humhalh chu mi tin mamawh tui hna kang chat tur leh tlem zel tur venna, boruak ṭha humhalhna a nih avangin mi tin mawhphurhna a ni, a ti.

Vawiin hun hmanaah hian Kangmei ven kawnga thawk ṭha khua chawimawina 'Village Level Fire Prevention Award 2022' lawmman sem a ni a, pakhatna hi Archhuang khuain an dawng a; pahnihna chu Siachangkawn niin, Vawmbuk Vaivakawn chu pathumna an ni a. Lawmmanah thuziak leh pawisa fai hlan ṭheuh an ni.

Green Mizoram Day hi a tirah chuan "Green Aizawl" tiin kum 1998 khan Aizawlah hman ṭan a ni a. Kum 1999 aṭangin "Green Mizoram" tih hming chawiin ram pumah hman a ni. Lawngtlai District bikah chuan kum 2000 aṭang khan hman ṭan niin, kum tin hman a ni a. Kum hmasa lam eng emaw ti chhung kha Green Mizoram Day hian Lawngtlai leh Mampui inkar kawngpui dungah thing phun ṭhin a ni a. EF&CC Department chhinchhiah danin Mampui kawnga thing phun zingah hian 1,485 chu a nung a, za zelah sawmkua (90%) nung ang a ni.

Post a Comment

Powered by Blogger.