Lawngtlai, June 23, 2022 : Samagra Shiksha, Lawngtlai District huaihawtin Lawngtlai RD Block huam chhunga Gurushala Teachers' Training kalpui tur chu Govt Model English School-ah nimin khan a hawnna inkhawm neih a ni. He hi Lai Autonomous District Council (LADC)-a Local Administration Department changtu Executive Member Pu C. Rongura chuan klhuallian niin a hmanpui.
Pu C. Rongura chuan zirtirtute chu hnama chiang, a taka ram hmangaihtu an nih a pawimawh a, ram leh hnam hma hun hriltu tak tak a nih avangin ram kalsiam atan zirtirtute chu an pawimawh hle a ni, a ti.
He hun hi Lawngtlai Block tana Nodal Officer, Samagra Shiksha-a Deputy DPC Pu S. Lalrinsiama chuan a kaihruai a. Pi R. Lalnunthari, District Project Coordinator, Samagra Shiksha, Lawngtlai District chuan lawm thu sawina hun a hmang a. Govt Model English School Headmaster, Pu B. Lalchungnunga chuan tawngtainain hun a khar a ni.
Khuallian Pu C. Rongura hi Pu H. Lalhmingmawia, Member, Planning & Development Board, LADC chuan a tawiawm a. He hunah hian LADC-a Education Officer (Middle School) Pu F. Lalhmachhuana leh Master Trainer (Gurushala) Pu Jonathan Kingbawl te pawh an tel.
Lawngtlai RD Block chhunga Gurushala Teachers' Training kalpui nan hian a thawh khat nan sikul pali - Govt Middle School, Thingkah; Govt Model English School; Govt Southern Standard Middle School leh Govt Bethel Middle School te thlan phawt niin, he'ng sikula zirtirtu 65 te chu Master Trainer 6-in an sikula kal chilhin an zirtir dawn a. Training thawh khatna hi vawiin, June ni 23 atang hian tanin, ni thum chhung kalpui a ni ang.
Gurushala Teachers' Training Lawngtlai District Administration hma laknaa Lawngtlai District chhunga zirna tihhmasawn nana Pratham Foundation nen tang duna pawl nga atanga pawl sawmpahnih inkar zirtirtute tana capacity development training a ni.
Post a Comment