Aizawl, June 27, 2022 : Chief Minister Pu Zoramthanga chuan vawiin tlai khan National Institute of Technology Mizoram Convocation vawi 5-na, Aijal Club a buatsaih chu a hmanpui. He hunah hian CM chuan in state dang tan pawh a entawntlak "Green NIT" campus an siam ngei a beisei thu a sawi.

Chief Minister chuan Convocation Address-ah graduate tharte chu a lawmpui thu sawiin, Graduate-te chu an kal zelna tur eng pawh thlang se, India ram economy a than chhoh lai taka graduate an nih avangin remchanna tam tak an tan a inchhawp tih hre chungin, an thiamna te chu ram leh mipui tan tangkaia hmang zel turin a chah a. An kal zelna turah theihtawp an chhuah chuan hlawhtlinna an hmuh zel theih tur thu a sawi. NIT campus nghet tha tak an neih thuai a duhsak pui thu sawi bawkin, an technology thiamna hmang tangkaia environment nen inhne rem tak "Green NIT" campus, state dang tan pawh a entawntlak an siam ngei a beisei thu a sawi bawk.

Convocation ah kum 2020-2021 academic session a degree pass chhuak kum 2016-2017 leh 2017-2018 Batch-a Under Graduate (UG), 2019-2020 a Post Graduate (PG) te leh Doctor of Philosophy (P.hD) te hnenah degree hlanna neih a ni a. Civil Engineering, Computer Science & Engineering, Electronics and Communication Engineering, Mechanical Engineering leh Basic Science & Humanities department atangin Bachelor of Technolgy (B.Tech), Master of Technology (M.Tech) leh Doctor of Philosophy (Ph.D) zirlai hlawhtling 121 te hnenah degree hlanna neih a ni. A hmunah hian zirlai 55-te chu mahni ngei kalin degree hlan an ni a; zirlai 66-te erawh chuan convocation hi a hmunah an chhim theilo a ni. Department tina zirlai titha ber theuh mi 7 hnenah Gold Medal hlan an ni bawk.

Post a Comment

Powered by Blogger.