Siaha, May 31, 2022 : Vawiin chawhma dar 10:30 khan MADC Session hall-ah Pu H. Malvina CEM MADC kaihhruai, MADC a Congress leh MNF tangdun sorkar fiahna, vote of confidence neih a ni a, Pu H. Malvina kaihhruai Congress leh MNF tangdun sorkar chuan fiahna a paltlang. 

Pu N. Viakhu Chairman MADC kaihhruai MADC sorkar fiahnaah hian eptu lam atangin sorkara rinna an nghah loh thu Pu M. Laikaw, Eptu leader leh Pu K. Hrahmo ten an sawi a, ruling lam atangin  Pu Hc. Lalmalsawma Zasai leh Pu H. Hrangchuanga ten sorkar an thlawpna thu an sawi bawk.

CEM Pu H. Malvina chuan a kaihruai sawrkar chu mipui sorkar dik tak a nih tur thu sawiin thlawp turin member te a sawm hnuah ban phara fiahna hun hman zui nghal a ni. Sorkar thlawp zawngin member 12 in vote an pe a, a thlawp lo zawngin member in vote 12 an pe bawk a, vote inzat a nih avangin CCB Rules in thuneihna a pek angin Chairman Pu N. Viakhu chuan casting hmangin Pu H. Malvina sorkar kaihhruai chu a thlawp thu leh hnehna a chan thu a puang zui a ni. 

Hemi hnu hian Pu H. Malvina chuan lawmthu sawiin, N. Viakhu chuan Dy. Chairman thlanna atan hming pek luh theihna hun naktuk chawhma dar 10:30am atangin hawn a nih thu leh Dy. Chairman thlanna hi May 2, 2022 dar 10:30am ah neih a nih tur thu sawiin chawhna dar 11:30am khan session  a titawp zui ta a ni. 

Tunhnaia MADC inthlanna neih zawk takah member 4 nei Congress leh Member 9 nei MNF tangdunin, Congress member Pu H Malvina kaihhruaiin sorkar an siam a, party mala MDC ngah ber MDC 12 nei BJP chu eptu-ah an thu a ni.

Post a Comment

Powered by Blogger.