Aizawl, May 6, 2022 : Nimin khan President Ram Nath Kovind chuan MZU Multipurpose hall-a Mizoram University (MZU) chuan Convocation vawi 16-na chu khuallian niin a hmanpui.
India rama University zawng zawnga hotulu ber Pu Ram Nath Kovind chuan tun tuma MZU atanga Degree nei leh a ti tha filawr thlanchhuah zinga tam zawk hmeichhia an ni chu lawmawm a tih thu a sawi a. MZU ah zirtirtu tha tak tak, research works a hnuhma nei tha tak tak an awm avangin MZU hian tun aia nasa zawkin hma a sawn zel dawn a, a lawmawm tak zet a ti.
President chuan Mizoram chu a mawi mai a ni lova, a chhunga lehkhathiam an tam em em a, state ang zawngin lehkhathiam ber pahnihna an ni a. Ramchhung sik leh sa a nuam a, a boruak a thianghlim in biodiversity ah a hausa em em a ni a ti a. Mizoram chu hun reilote chhungin sumdawnna hmunpui, India hmarchhak tihhmasawnna kawnga state pawimawh tak a ni chho dawn a, International ramri thui tak – Myanmar leh Bangladesh te nen an intawmna hi Border trade tihhlawnna hmun remchang a ni chho mek a, KMMTTP thawh zawh a nih hun phei chuan India hmarchhakin a thawhchhuahte ram danga a thawnchhuahna kawtchhuah pawimawh tak a ni dawn bawk a ni a ti.
MZU hi kum 2001 khan din niin a Campus zau zawng hi 978.19 acres a ni. Kum 2016 leh 2021 inkarah khan NIRF chuan MZU chu India rama University thazual Top 100 zingah a dah a ni. MZU hian Academic department 38 a nei mek a. UG, PG, M.Phil leh PhD zirna School of Study 6 hnuaiah a kalpui a. Constituent College 1 neiin affiliated college 35 a nei bawk. Tunhnai kum 4 chhungin MZU chuan Zirna thar ( new courses) 9 a hawng thar a, Constituent College – Pachhunga University College-ah Zirna thar 5 a hawng leh bawk a. University Southern Campus chu Lungleiah kalpui a ni thei tep a; Ministry of Education pawhin rawtna thehluh chu an pawm thuai a beisei a ni.
Post a Comment