Lawngtlai, May 28, 2022 : Central Young Lai Association chuan vawiin khan thuchhuah siamin District Hospital Lawngtlaia doctor indaihloh avanga doctor specialist dah belh an phutna leh Bungtlang South PHC a doctor dah an phutna avanga sorkar nawrna atan a Picketing an neih chu an tihtawp thu an puang.
Central YLA chuan sorkara an thil nawr chu an duhthusam ang thlapa hlawhtling ni chiah lo mahse, Lawngtlai District mamawh em em doctor speacialist - Gynaecolist, Pediatrician leh ENT Specialist te chu District Hosptal Lawngtlaia an rawn dawh tak avang leh Bungtlang South PHC-ah Medical Officer an dah tak avangin hemi chungchanga sorkar an nawrna chu vawiin Central YLA CEC leh Town Branch aiawha Joint meeting thuchhuak angin tihtawp a ni a ti.
Central YLA chuan doctor kan neih theihna tura hmalatu Lawngtlai East leh West MLA, CEM LADC te leh Deputy Commissioner, Lawngtlai chungah lawmthu an sawi a. Tin, heng harsatna te leh sorkar laka an duhna thehdarh sak tu National, North-East, Mizoram leh Local Media (Print & Electronic) te chungah lawmthu an sawi a. Branch YLA leh member-te chungah lawmthu an sawi bawk. Picketing an neih chhunga Lawngtlai District mipuite thawhpuina leh thlawpnaah lawmthu an sawi bawk.
Central YLA chuan District Hospital Lawngtlaia doctor indailohna chungchangah hian hma an la zel dawn tih an sawi a, District Hospital Lawngtlaia thawktu indaihlona chu ngaih pawimawh sak turin leh post dang la awm lo, General Surgeon -te, khum 50 awmna tur khum 30 chauh awm te, Nurse indaihlona hrang hrang leh thawktu indaihlohna te chu a rang lama dah khat turin sorkar an phut tih an sawi a. Hemi chungchang hi an enzui reng dawn thu leh a tul anga District mipuite tan tun aia na zawkin hma an la leh dawn tih an sawi bawk. Tin, district danga thawktu indaihlohna pawh ngai pawimawh a, district hrang hrang intluktlanna tura ruahmanna siam turin sorkar an phut bawk.
May 20, 2022 khan District Hospital Lawngtlaia thawk lai Dr. Andrew Kawlthangpuia, Grade-II (Bungtlang South PHC-ah) leh Dr. Paul Lalchungnunga, Grade-II (Phura PHC-ah) te chu sawnchhuah an ni a, CYLA nawrna avangin May 25, 2022 khan doctor pahnih transfer order hi sut leh a ni. May 23, 2022 khan District Medical Superintendent, Lawngtlai nilai Dr. Zothanpari Chhakchhuak, Grade-I leh Dr. Lalmalsawma, Grade-II pawh District Hospital Saitualah sawn a ni a, Dr. Lalramhluna Tochhawng, Grade-II (Rawpuichhip PHC), Dr. K. Vanlalhriati, Grade-III (District Hospital Serchhip) leh Dr. Lalbiakdiki, Grade-I, Civil Hospital Aizawl te chu District Hospital Lawngtlaia thawk tura rawn dah an ni. May 25, 2022 khan Dr. Lalbiakdiki transfer order hi sut leh a ni a, Dr. Beiparysa K, Grade-II (Specialist), District Hospital Lawngtlaia thawk lai chu DMS District Hospital Lawngtlai hna chelh tura tih a ni thung.
May 26, 2022 khan Bungtlang South PHC-a thawk tur Medical Officer Dr. Lalsanglura Chhakchhuak chu Mizoram sorkarin a dah a, nimin May 27, 2022 khan District Hospital Lawngtlaia thawk turin Dr. Zosangpuii, Grade-II of MHS (Speacialist Sub-Cadre) chu a rawn dah bawk.
Post a Comment