Lawngtlai, May 24, 2022 : Central YLA chuan District Hospital Lawngtlai-a Doctor thawk lai indaih lohna a nasat em em avanga hun engngemawchen aṭanga thawktu dang dil belh a nih laia thawktu awmsa te sawnchhuah an nih avanga lungawi lohna lantir nan leh Mizoram Sawrkarin Doctor dang a lo dah belh thuai theihna tur atana Sawrkar nawr nan naktuk, May 25, 2022 (Nilaini) aṭangin Lawngtlai Khawpui chhungah leh Bungtlang South hmunah te Picketing a huaihawt dawn.

Picketing neih chhung hian Sawrkar Office, Bank leh School zawng zawngte Office/School kal thei lo tura dan vek  a ni dawn a, Lawngtlai Town Branch leh Bungtlang Sub-Hq & Branch te chu mahni veng chhunga Office, School, Bank leh Company te lo dang ṭheuh turin ngen an ni bawk.

Picketing hian Post Office, Power & Electric Department-a line chhia siam tur te, PHE Department-a tui sem hna thawktu te leh Damdawi In hrang hranga thawktute chu a huam dawn lo a ni.

May 20, 2022 khan District Hospital Lawngtlaia thawk lai  Dr. Andrew Kawlthangpuia, Grade-II (Bungtlang South PHC-ah) leh Dr. Paul Lalchungnunga, Grade-II (Phura PHC-ah) te chu hmun dangah sawn chhuah an ni a. Nimin, May 23, 2022 khan District Medical Superintendent, Lawngtlai nilai Dr. Zothanpari Chhakchhuak, Grade-I leh Dr. Lalmalsawma, Grade-II te chu District Hospital Saitualah sawn an ni leh bawk.

Hetih lai hian nimin vek khan Mizoram sorkar H&FW department chuan Dr. Lalramhluna Tochhawng, Grade-II (Rawpuichhip PHC), Dr. K. Vanlalhriati, Grade-III (District Hospital Serchhip) leh Dr. Lalbiakdiki, Grade-I, Civil Hospital Aizawl (DMS Lawngtlai tur) te chu District Hospital Lawngtlaia thawk turin rawn dah.

Post a Comment

Powered by Blogger.