Lawngtlai, May 24, 2022 : Lawngtlai Bawrhsap Pu Amol Srivastava chuan furpui hmachhawn mai tur kan nih avangin chhiatna thleng thei hrang hrang pumpelh tura inpuahchah a pawimawh hle a ni, a ti.

He thu hi vawiina Lawngtlai DC Conference-a Lawngtlai District Disaster Management Authority (DDMA) thutkhawmnaah Lawngtlai Bawrhsap chuan sawiin, khuarel chhiatna hrang hrang leh mihringin a thlen chhiatna te a lo thlen hun tur hriat lawk a nih loh avangin inring renga awm a ṭul tiin, chhiatna a lo thlen thulh pawha hma lak dan tur ruahmanna fel tak neih a ṭul a ni, a ti.

He hunah hian damdawi inte kangmei laka an himna (fire safety) tur ruahmanna te, sawrkar office leh hmun pawimawhte kangmei laka himna tur ruahmanna te, furpui lo thleng tur atana chhiatna thleng thei laka him nana inpuahchahna te, kum tluana chhiatna thleng thei laka mipui zirtirna leh inpuahchahna chungchang te sawi ho a ni a. Tuna District dinhmun thlir ho niin, hmasawnna tur rawtna leh hmachhawp te sawi ho a ni.

He hunah hian Lawngtlaia damdawi inte leh office hrang hrangte'n kangmei chhuah thulh leh lirnghing leh chhiatna dang a lo thlen palha hma lak dan tur ruahmanna (plan) fel tak siam vek se, tih a ni a. Kangmei, lirnghing leh chhiatna dang a thlen thulha hriat tur pawimawh zual leh biak pawh tur tar lanna (Standard Operating Procedure) theh darh tur buatsaih ni se tih niin, Incident Commander-te'n an huam chhunga chhiatna thlen hlauhawmna hmunte zir chiangin, hma lak dan tur ruahmanna fel tak nen inpuahchah lawk ni se, tih a ni bawk.

He hunah hian kangmei chhuak leh chhiatna dang thlengah electric current kal sual vanga chhiatna lian tham zawk a thlen loh nan Power Control Room-a report a, power supply tihtawptir vat ṭhin a pawimawh thu te pawh tar lan a ni.

Post a Comment

Powered by Blogger.