Congress in BJP emaw MNF emaw sorkarna siampui an tum lo

Siaha, May 10, 2022 : MPCC Treasurer, Pu Zodintluanga chuan Mara mipui ten Congress seat 4 an pe chu lawmawm a tih thu a sawi a , BJP leh MNF chu an thawhpui dawn lo ve ve tih vawiina MDCC President, Pu S. Hiato chenna-ina Siahaa thuthar lakhawmtute a kawmnaah a sawi.

Pu Zodintluanga chuan 'mipui ten eptu party-ah awm rih rawh u an tihnaah kan ngai a, chuvangin MPCC-a PAC chuan MADC-ah BJP leh MNF thawhpui loh ve ve nise tiin a rel a, Congress chuan eng party mah thawhpui an tum ta lo a ni' a ti. Pu Zodintluanga chuan BJP leh MNF te chu central-a thawkdun an ni a, tun tumah pawh hian thawkdun awm berah kan ngai a ti bawk.

MDCC President, Pu S. Hiato leh MPCC GS Pu Zothangliana te chuan BJP chu sorkar laipuiah an khingpui lian ber a nih vangin thawhpui a rem lo va, MNF pawh State-ah an khingpui ber a ni a, thawhpui a rem lo a ni an ti a, Congress chuan an party inkaihruai dan felfai taka kalpui zel an tum tih an sawi.