Vaseikai, April 6, 2022 : Vawiin tlai dar 5:30 vel khan Vaseikai leh Longpuighat inrinna lei dawh mek chu a chim.
Tuichawng lui chunga lei dawh hman mek chu a hlui deuh tawh avangin a bulah chiah hian kumin January thla atang khan lei thar dawh a ni a, lei chim lai hian hna hi la zawh loh a ni a, a ruhrel ang chiah la dawh a ni.
Vaseikai khawtlang hruaitute sawi danin, Vaseikai lamah hian lei dotu ban pakhat siam a ni a, Longpuighat lamah hian pahnih siam a ni bawk. Longpuighat lama lei dotu pakhat zawk, lei dotu ban sang ber hian a dawl lova, a tliak a, hei vang hian a dangin a zo tawh lova, a chim ta a ni. Lei chim lai hian a thawktu mi paruk an awm mek a, pali chu lui lamah tlathhlain, pahnih chu an tla ve lo.
Lei atanga tla palite hi BSF Camp Vaseikaiah hruai an ni a, pakhat chu a hliam a na deuh a, khawtlang hruaitute leh BSF lam chuan a dam chhuah an ring lo. Hliamte hi an vaiin hian Lawngtlaiah phurh chhoh an ni. Hliamte hi Tirang District, Assam a mi vek an ni.
Lei thui zawng hi feet 100 vel a ni a, lui atanga a san zawng hi feet 40 bawr vel a ni. Lei chim chhan chiang zawk leh a hnuleha bawhzui ngai awmte sawihoin naktuk hian Vaseikai YLA leh Vaseikai Police OC te an inkawm dawn.
Lei siam hna thawktute hi VIJ Engineering Company an ni a, an Manager Tarun Kumar Sinha chu lei chim hnu hian a tlanbo tih Vaseikai Police OC chuan a sawi bawk.
Post a Comment