Lawngtlai, April 7, 2022 : Kum 2019 atanga Tuipui Ferry kawng siam hna thawh chu kumin June thla hmaa thawh zawh hman tum a nih thu Robert Lalrinawma, Managing Director, VINCO Contruction chuan a sawi.
Tuipui Ferry kawng hi Areopagi atanga Tuipui Ferry thlenga siam hna thawh mek a ni a, project amount hi GST telin nuai 2587 a ni. He project hi North East Special Infrastructure Development Scheme (NESIDS) hnuai a mi a ni a, Lawngtlai PWD in en enkawl a ni.
Pu Robert Lalrinawma chuan he kawng siam hna hi kum 2019 atanga thawh tan a nih thu a sawi a, a tirah ram neitu ten sorkarah zangnadawmna an phut avangin thla 3 vel chhung chu hna an tan thei lo tih a sawi a. Sorkar lam atangin zangnadawmna hi pek tur sanction a awm loh avangin an pawisa nuai 43 vel an pek thu a sawi a, hei pawh hi an la hmuh loh thu a sawi bawk. Ram neitute hian kawng siam loh ai chuan tiin an inphahhniam a, tlawmngaih an chhuah tak meuh tih a sawi.
Pu Robert Lalrinawma chuan duh angin hna a kal chak thei lo tih sawiin, sorkarin bill an pek that loh avangin an pawisa neihsa hmangin hna hi an thawk tih a sawi a. Bill an lak hnuhnung ber hi kumin January thla kha a ni a. Hetiang reng an nih chuan an tum hunah pawh hna hi an thawh zawh hman a rin loh thu a sawi lang bawk.
Pu Robert Lalrinawma chuan Lawngtlai DC, LADC hotute, PWD, Police, YLA, VC, MJA Lawngtlai leh khawtlang hruaitu ten an thawhpuinaah lawmthu a sawi bawk.
VINCO Construction Project Engineer Pu Albert-a chuan an hnathawh tawh dan sawiin, 'Kan hnathawh tur thui zawng hi 10kms nia sawi a ni a, kan teh thatin 8.5kms a ni a, hei hi PWD lamin an siam rem turah ka ngai. GSB (A hnuai ber) hi a vaiin phah zawh tawh a ni a, a chung chiah WBM Grade 2&3 hi 98% zawh tawh bawk a ni bawk a, blacktop hi FCI Godown atangin 3kms a thui kalpui a ni tawh bawk. Hna kan thawh chak theih loh chhan pakhat chu material kan hmuh that loh vang leh lirthei tlan nasa lutuk vang a ni' a ti.
‘A tirah chuan khaw chhung, Areopagi atanga thawhtan tum a ni a, mahse, PHE in pipeline an phum avangin FCI Godown atangin tan a ni. Khawpui chhung pawh hi pipeline an phum zawhah tan a ni ang' tih Pu Albert-a chuan Rauthla a hrilh.
Pu Albert-a chuan hna an thawhna kawngah khawtlang hruaitu ten an thawhpui tha tih a sawi bawk.
Post a Comment