Lawngtlai, April 22, 2022 : Lawngtlai District Sports Complex sakna tur hmunhma Mampuia mi chu vawiin khan Pu C. Hrangthianga, EM, SYS; LADC, Pu LR Dinglianga, bialtu MDC; Pu Matthews R. Laldinpuia Secretary, LDSC leh Mizoram State Sports Council-a Engineer te leh VC leh YLA Mampui aiawh ten an enfiah.
Pu C. Hrangthianga chuan, Covid-19 avangin beisei leh duh angin hna thawh zung zung a harsat thu sawiin, Mizoram State Sports Council lam atangin hnathawh theih anih tawh thu a sawi a, hetih mek lai hian hnathawhna tur hmunhma te duh anga kalpui theih anih loh avangin beisei angin hnathawh tan theih ala nilo tih a sawi a. LADC- Sawrkar atanga lehkha pawimawh chin fel ngaite chinfel hna thawh mek anih tih sawiin, vawiin ni hian MSSC lam atanga hnathawhna tur endik tura lo kalte nen a hmalama hnathawh a nih theihna turin a hmunhma te enfiah an nih thu a sawi.
Sports EM chuan, Zirna leh sports kal kawptir a pawimawh thu sawiin, Mizoramin sports thiam bikte a bika enkawlna sikul a nei ve tur chu lawmawm a tih thu leh Lawngtlai mipuite kan vanneih bikzia kan hriat a beisei thu a sawi a ni.
Lawngtlai District Sports Complex tur Mampui khuaa sak tur hi PMJVK Scheme sum hmanga Rs nuai 5,019.43 senga sak tura ruahman a ni a. Lawngtlai District Sports Complex ah hian Athletic Ground, Futsal Ground, Basketball Court, Volleyball Court leh thil dangte a keng tel dawn a. Hemi atan hian 1st instalment Rs nuai 2,258.74 chu Mizoram sawrkar chuan a dawng tawh bawk a ni.
District Sports Complex hmun atana ruahman hi Lawngtlai khawpui atanga km 20 vela hlaa awm a ni a. Mampui khaw ram niin, he lai ram hi Lai Typical Village leh khualzin hipna atana cheibawl chhoh mek a ni bawk.
Post a Comment