Lawngtlai, April 22, 2022 : Vawiin khan Lairam Upa Pawl General Conference vawi 2-na chu LADC Conference Hall-ah hman a ni a. He hunah hian Pu C. Rongura, EM (LAD) LADC chu khuallian niin, Pu JB. Vanhoy, EM (Social Welfare) LADC chu khualzahawm a ni.
Pu C. Rongura, LAD changtu EM chuan, Lairam Upa Pawl member-te chu kan ram leh hnam tana mi hlu leh theihna tam tak lo hmang tawhtu leh ngaihtuahna lo seng thin tute, ram leh hnam tan rohlu an nih thu sawiin; Nu leh pa te leh an tute hnenah ram leh hnam hmangaihna leh hnam zia leh rang, chawisan leh humhalhna kawnga zirtirtu ni zel turin angen a ni.
Pu C. Rongura EM chuan, ram changkang leh hnam fing apiangin kum upa te an zahin an chawimawi thiam a, enkawlna tha tak tak pein, kum upa te lawmman te pawh an siam sak bawk thin a; LADC sorkar pawh hian kum upa te lawmman a pe ve thin a, LADC chuan Upate hamathatna turin theih tawp a chhuah zel dawn a ni tih a sawi bawk.
Pu JB. Vanhoy, EM (Social Welfare) LADC chuan Lairam leh hnam humhalh tura Pawl ding a awm thin hi a lawmawm hle a, Pathianin Lairam leh hnam hi a hre reng a, a la hruai chhuak ngei ang a, dinchhuah hun ala neih ngei a beisei tlat tih a sawi.
LUP General Conference hi Pu N. Fambawl, Vice President in kaihruaiin, Pu NC. Muankima, General Secretary in report a pein, orelna an nei chhunzawm nghal a ni.
Post a Comment