Rauthla, April 28, 2022 : Prime Minister Narendra Modi-a’n nimin khan state leh UT Chief Minister te leh Lt. Governor te Covid-19 hrileng meka an dinhmun leh hmalak zel dan tur chungchangah video conferencing a neihpui.
Pu Modi-a chuan ramchhunga COVID-19 hrileng chu a lo zo lo tih sawiin inralrin reng a tul thu a sawi a. Omicron leh hri chi dangten Europe ramahte harsatna tamtak a thlen mek a ti a. Scientist leh mithaim ten hrileng dinhmun hi uluk takin an vil reng a ni a ti bawk. Inhmuhkhawm koh anih chhan hi tunhnaia state leh UT thenkhata hri kai an punchhoh leh tak vang a ni.
Mizoram Chief Minister Pu Zoramthanga chuan Covid hrileng hmachhawnna kawnga sawrkar laipuiin state a puihna chungah lawmthu a sawi a. State chuan “Test – Track – Treat – Vaccinate and observe CAB” chu tha taka a kalpui thu te, sawrkar policy zawm that avang te, kohhran leh tlawmngai pawl tawiawmna tha tak avang te a case a tlakhniam mek thu sawi bawkin, tun dinhmunah covid-19 vei mek awm zat chu 759 ni mahse, hospital a enkawl mek chu mi 20 an tlin loh thu te a sawi.
CM chuan COVID-19 avanga thi ta te chhung hnena Ex-gratia/ compensation chu dilna 624 lut a awm tawh thu te, April ni 24, 2022 thleng khan 596 (95.5%) chu pek an ni tawh tih a sawi bawk.
Post a Comment