Lawngtlai, April 11, 2022 : Nimin khan 18th Mizoram Volleyball Association Championship 2022 Hnahthiala neih zawh taka Champion team Lawngtlai DVA te chuan Lawngtlai an lo thleng a, Lawngtlai District Sport Committee buatsaihin Chandmary Inpuiah anmahni lawmna hun hman a ni. Lawngtlaia sport discipline hrang hrang hruaitute he hunah hian an tel.
He hun hi C. Lalhmangaihkima, Vice Chairman, Lawngtlai District Sport Committee (LDSC) chuan a kaihruai a, Lawngtlai District chhunga Sport Discipline hrang hrangin champion lawmna thilpek an hlan.
He huna thusawitu Pu C. Hrangthianga, EM i/c SYS etc., LADC chuan, kum 2000 a Lawngtlai District Volleyball Association din a nih khan a dintute zinga mi a nih thu leh President hmasa ber a nih thu a sawi a, LDVA tan a ngaihtuahna a la sen reng thu a sawi.
Pu C. Hrangthianga chuan, infiamna discipline hrang hranga hlawhtlinna chang tur chuan coach tha an pawimawh a, LADC hnuaiah hian coach tha kan nei lova. Tunah hian Recruitment Rules te siamin coach tha kan neih theihna turin LADC chuan hma a la mek a, coach atan hian NIS coach ngei an luh theih nan hmalak a ni a ti. ‘Midangte pawh professional player an ni thei a, kan district infiammite hian in nih theih loh bikna tur a awm lo. District dangin an sawm theih player ni turin champion in nihna atang hian bul tan rawh u’ a ti.
Pu Hc. Vanlalruatpuia, President, Central YLA chuan, champion team te chu ropui taka hmuah an tum tih a sawi a, amaherawhchu, hunin a zir loh avang leh chhiat tawhna thil a awm avangin a remchang angin hun buatsaih a ni tih a sawi a. ‘YLA chuan champion team te chu Pasaltha chawimawina kan pe che u a ni’ a ti bawk. Infiamnaa pawimawh leh ber Lawngtlai District infiammite mamawh ber chu discipline a nih thu a sawi a. ‘Sport EM chu a taka hnathawk mi a ni a, in champion avangin court tha tak a siam ngei ka beisei’ a ti bawk.
LDSC Secretary Pu Matthews R. Laldinpuia chuan Mipa in hlawhtlinna an chan laia hmeichhe lam an vanduai chu pawi a tih thu a sawi a, mipa champion-a kawngah hmeichhia an pawimawh hle a ni a ti a. He champion hi Lawngtlai Dist. tan a ni a, Lalpa’n thil ropui tak min tihsak a ni a ti.
R. Lalramfela, manager chuan technical report pein, Lawngtlai Mipa team hian Group stage-ah Saitual, Hnahthial, Lunglei leh Kolasib an hneh a, semi final-ah Mamit hnehin final-ah Kolasib an hneh. Hmeichhe lamah Group Stage-ah Khawzawl leh Lunglei an hneh a, Kolasib leh Aizawl an hneh lo.
Post a Comment