Rauthla, April 11, 2022 : April ni 5 atanga Mizoram Volleyball Inkhawmpui lian 18th MVA Inter District Volleyball Championship 2022 Hnahthial in a thlen chu Inrinni zan khan zawhfel a ni ta a, Mipa lamah Lawngtlai District an champion a, hmeichhe lamah Aizawl District an champion bawk a ni.
Kharna hunah thu sawiin David Zochhuanmawia, Organising Secretary chuan Mizoram-ah District 11-a a awm a, remchan lohna avangin Siaha an rawn kal thei lova, District 10 kan inel ta a, Organizing lam MVA te hi a tir atanga a tawp thlengin kan awm thin a, kan mikhualte thlenna hmun hi kan tlawhchhuak vek a, kan players ten harsatna an nei em, an thlen in lamah harsatna leh buaina an nei em tih te kan zawt thin a, kan nau te, kan player te hmun hrang hrang atanga kal khawmte hian vui leh vaina an nei lova, in neih ang ang zo ar te in lo pe leh zel hi kan lawm a ni. Central YMA nen tang tlang in Inter Branch Volleyball Tournament siam leh an tum tih sawiin he hunah hian Hnahthial Team pawh kal ve ngei turin a sawm bawk a ni. Pu David-a chuan infiamna thianghlim tak nei turin a tir atangin kan bei a, khua a lum em em a, hei vang hian harsatna kan tawk lek lek thin a, damdawi in lamin ambulance an chhawp a, police lamin prison van an chhawp bawk a, harsatna leh buaina lutuk thleng lova a tawp kan khar thei tur hi lawmawm kan ti hle a ni a ti bawk.
18th MVA Inter District Volleyball Championship 2022 neih zawh taka mimal chawimawina hetiang hian hlan ni. Mipa lamah Best Setter atan Lalrawngbawla, Kolasib DVA thlan niin Best Spiker-ah R. Vanlalmawia, Kolasib DVA thlan a ni a, Best Server-ah Kharlianzuala, Lawngtlai DVA thlan a ni bawk. Hmeichhe lamah Best Setter atan FVL Hmuchhuaki, Aizawl DVA thlan a ni a, Best Spiker-ah Hmingthazuali, Kolasib DVA leh Best Server-ah F. Lalparmawii, Aizawl DVA te thlan an ni bawk.
Post a Comment