Lawngtlai, April 18, 2022 : Vawiin khan National Health Mission (NHM), Health & Family Welfare Department huaihawtin Lawngtlai Block tan Govt Region Higher Secondary School, Lawngtlaiah block level health mela buatsaih a ni. Health Mela hi Ministry of Health and Family Welfare, Govt of India-in India Independence kum 75-na lawmna, "Azadi ka Amrit Mahotsav" puala April ni 18 - 29, 2022 inkar chhunga India ram chhung block tina health mela (hriselna kutpui) a buatsaih kalpui mekna a ni.
Tukin zing dar 9:30-a GRHSS tuala Lawngtlai Block tana health mela buatsaih hawnna hun hi Lawngtlai East Bialtu MLA, Agriculture Development Board Vice Chairman Pu H. Biakzaua chuan a hmanpui. Pu H. Biakzaua chuan Lawngtlai District block tina health mela buatsaih mek chu Lawngtlai District tan thil lawmawm tak a ni a, mipuite pawhin an hlut hle a rin thu a sawi a. COVID-19 hri lengin harsatna leh tuarna nasa tak a rawn thlen a, nunna hlu tak kan chan chu a lungchhiatthlak hle a ni a ti a. Hetih lai hian mipui inralrinna leh hriselna kawnga inbuatsaihna leh hmasawnna a rawn thlen chu a phena malsawmna nia a hriat thu a sawi. Mipuite’n inentir chu kan peih a, damdawi ei kawngah leh zuk leh hmuam leh ei leh ina insum kawngah kan inthlahdah ṭhin chu thil pawi tak a ni tiin, health mela chhimtute chu doctor-te thurawn pawm thiam turin a chah a. Sawrkarin mipui hmakhaw ngai taka health care scheme a kalpui chu a hlutna hria a, inziak lut tur leh chhawr ṭangkai tum turin mipui kal khawmte chu a chah a ni.
Health mela hawnna inkhawm hi Lawngtlai Bawrhsap Dr Andrew H. Vanlaldika'n kaihruaiin, kal khawmte lawmna thu a sawi a. Senior Medical Officer Dr S. Thaizi chuan report pein, Chief Medical Officer Dr LP Malsawma'n lawm thu a sawi a. Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana bul ṭan nan Khuallian Pu H. Biakzaua leh Bawrhsap Dr Andrew H. Vanlaldika te chu Ayushman Bharat Health Account (ABHA) hawnsak nghal an ni.
Lawngtlai Block tana health mela buatsaihah hian stall 10 leh clinic 8 hawn niin, inziah luhna leh OPD hawn a ni bawk a. Stall hrang hrangah hian inkai chhawn theih loh natna (non-communicable disease) lam te, zuk leh hmuam kaihhnawih (tobacco) lam te, rilru hriselna (mental health) lam te, HIV/AIDS kaihhnawih (MSACS) lam te, hri danna pekna (vaccination) hmun leh NHM hnuaia prog hrang hrang inphona hmun te buatsaih niin, Ayushman Bharat Digital Mission hnuaia India khua leh tui tinin hriselna kaihhnawih ID hran (Unique Health ID) an neih tur atana lo inziah lawk theihna te, AB-PMJAY Golden Card siamna hmun te buatsaih a ni a. Specialist leh daktawr thiam tak takte chu mipui rawn theih turin clinic hawngin an ṭhu bawk a ni.
Block level health mela hi April ni 21 (Ningani)-ah Chawngte Block tan Chawngte-ah, April ni 22 (Zirtawpni)-ah Bungtlang 'S' Block tan Bungtlang 'S'-ah leh April ni 26 (Thawhlehni)-ah Sangau Block tan Sangau-ah te buatsaih leh tura ruahman a ni.
Vawiina Lawngtlaia health Mela chhimtute hi an vaiin mi 816 an ni.
Post a Comment