Rauthla, April 15, 2022 : English manager Sean Dyche chuan kum 10 zet a chamchilh hnuah Turf Moor a chhuahsan dawn ta. Burnley chuan kum 2012 a an manager atana an lakluh Sean Dyche chu vawiin khan an ban thu an puang.
English club Burnley hi Premier League-ah point 24 hmuin, table-ah 18-na an ni mek a, match 8 la khelh tur awmah premier League-a inhamtang zo lo dinhmunah an ding mek. Match 3 an chak lo zawn tawh bawk.
Burnley Chairman Alan Pace chuan club-a hmasawnna nasa tak a thlenpui avangin kum 50 mi, Sean Dyche-a leh a staff-te chungah lawmthu a sawi a. Alan Pace chuan, tun season hi a harsa em em a, kan dinhmunah hian kan lungawi lo. Tuna thutlukna kan siam pawh hi kan tan a harsa a ni. Coaching Staff lam hi inthlak kual thain kan hria a, match 8 la khelh tur awmah hian theihtawp chhuaha, Premier League-a inhamtan ngei hi kan tum a ni a ti.
Burnley hian premier league-ah tun Pathianni hian West Ham an hmachhawn dawn a, U-23 coach Mike Jackson, Academy Director Paul Jenkins, U-23 goalkeeping coach Conor King leh clun captain Ben Mee ten club an enkawl rih ang a, manager thar hi an lakluh thuai beisei a ni bawk.
Sean Dyche hian kum 2007 a Northamton Town atanga football a chawlhsan hnuin, hemi kum vek hian a club hlui Watford U-17 a enkawl a, kum 2009 ah Malky Mackay-a assistant niin, Watford a enkawl chhunzawm. Kum 2011 ah Mackay-ah Watford a chhuahsan a, manager nghet tan Sean Dyche hi lakluh a ni.
Kum 2012 September thlan khan England National U-21 Team backroom staff pakhat atan lak a ni a. Hemi kum vek October thlaah Burnley manager Eddie Howe chuan Bournmouth lamah a chhuahsan a, Sean Dyche chu Burnley manager atan lakluh a ni. Kum 2013 khan Premier League lamah a inpetkai a, season khat an klhelh hnuin championship lamah an tla leh a. February 2016 khan contract thar ziakin, hemi kum hian Premier League a kaipui leh. Kum 2017 season khan Sean Dyche chuan Burnley chu Premier League-ah 7-na a nihpui a, hemi Europa League qualification a hruai thleng.
Post a Comment