Lawngtlai, April 27, 2022 : Lawngtlai District Level Committee on Fire Prevention (DLCFP) huaihawtin vawiin khan Lawngtlai District chhunga ram kang ven kawnga hma lak dan tur chungchangah inrawn khawmna buatsaih a ni a. He hunah hian Department hrang hrang, village council leh tlawmngai pawl ai awhte an kal khawm.
He hun hmanpuitu Lawngtlai Bawrhsap Dr Andrew H. Vanlaldika chuan 'kangmei chhuakin a nghawng tam zawk chu a taka kan tuar nghal ṭhin a ni a, hemi a nih avangin kangmei ven kawnga hma laknaah inthlahdah a rem lo' a ti. Nikuma Mizoram hmun hrang hranga ram kang chu ramin a tuar zia leh kang thelhna duhthusam awm lo leh ram leilutin a zir loh avanga Forest Department, VC leh tlawmngai pawlte hah zia sawiin, 'kangmei venna kawngah awmze nei zawka hma lak dan ngaihtuah a ṭul a ni' a ti.
He hun hi Lai Autonomous District Council (LADC)-a Deputy Conservator of Forests Pu C. Sangliana'n a kaihruai a. District Council Conservator of Forests Pu K. Lalromawia'n kangmei venna kawnga hriat tur pawimawh leh hma lakna awm mekte a sawi fiah a. Kal khawmte hian kangmei chhuakin harsatna a thlen dan te, kangmei chhuah chhan leh sawrkar leh kohhran, tlawmngai pawl leh mimal mawhphurhna hrang hrang te leh kangmei laka Lawngtlai District a him zawk theih nana hma lakna tur rawtna hrang hrangte an sawi ho va. LADC-a Range Officer (Headquarters) Pu B. Lalrinmuanpuia'n lawm thu sawiin hun a khar a ni.
Forest Survey of India (FSI)-in a chhut danin kum 2004 - 2017 chhung khan Mizoramah ram kang hmun 32,659 zet a awm a, India ramah a tam ber a ni. Mizoram pumah ram kang (forest fire) hi November 2018 - June 2019 inkar khan hmun 7,597; November 2019 - June 2020 inkar khan hmun 7,361 leh November 2020 - June 2021 inkar khan hmun 12,846-ah a thleng a ni.
Post a Comment