Lawngtlai, April 26, 2022 : Vawiin, April 26, 2022 hian CYLA Playground ah Lai Autonomous District Council, Chief Executive Member Football Running Trophy final khelh niin, Pu V. Zirsanga, CEM LADC chu khuallian a ni. Final hi Lawngtlai-III MDC Constituency leh Lawngtlai Vengpui MDC Constituency ten an khel a ni.

Khuallian Pu V. Zirsanga chuan, Lawngtlai District hi infiamna kawngah hma kan sawn a ngai hle a. Kan sorkar pawh hian thalaite infiamnaah hma kan sawn theihna turin theihtawp kan chhuah mek zel a. Sorkar pawhin infiamna hi eizawnna tlak anih theihna turin kawng a sial mek zel a ni, a ti.

Pu V. Zirsanga chuan, Infiamna hi a thianghlim hle a. Football ah hian indaidanna hi a sutlang vek mai a. Hemi anih avang hian mi zawng zawng hian hmuhnawm kan tiin hmuhnawm kan ti tlang hle a. Infiamnaah hian chi leh chi, Hnam leh Hnam Inthliarna pawh a supawp mek zel a ni, a ti bawk. 

Kan hruaitute hian football-a hma kan sawn theihna turin ngaihtuahna an seng a, mahse footballer ten theihtawp kan chhuah lo deuh niin a lang a. Kan tualzawlah chauh football khel lova, ram dang leh hmun danga khel thei turin theihtawp kan chhuah a ngai tawh a ni, a ti bawk.

Kan sorkar hian discipline hrang hrangah hma kan sawn theihna turin kawng hrang hrangin hma a la chho mek zel a. Chu chu infiammite pawh in hria a, theihtawp chhuah a hlawhtlinna chang theih tura tan kan lak ve a ngai a ni, a ti a. Infiammi chuan mahni taksa tichhe thei laka fimhlim a, inthu nun kan mamawh a, chu chuan hlawhtlinna min hmuh tir ngei dawn a ni, tiin Pu V. Zirsanga chuan final kheltu team pahnih te chu champion ngei turin duhsakna a hlan bawk a ni.

Vawiin CEM LADC Football Running Trophy final-ah chuan Lawngtlai Vengpui chuan 2-0 in Lawngtlai - III hnehin an champion.

  • Champions - Lawngtlai Vengpui
  • Runner Up - Lawngtlai - III
  • Best Player - Lalramthanga (Lawngtlai Vengpui)
  • Top Scorer - Laldinpuia (Chandmary (5 Goals)
  • Best Goalkeeper - J. lalhmingsanga (Lawngtlai Vengpui)
  • Best Promising Player - Joseph Zothanmawia (Lawngtlai - III)
  • Fair Play Award - Lawngtlai Vengpui

LADC CEM Football Running Trophy hi April 19, 2022 atang khan CYLA PLayground-ah khelh tan a ni a, he tournament-ah hian LADC area chhung atanga MDC Constituency 16 an chhuak a. Pool A leh B ah then niin, semi-final chu double leg-a khelh a ni bawk.

Tournament chhung hian match 18 khelh a ni a, goal 46 lutin, yellow card hi player 69 in an hmu a, player 6 in red card an hmu bawk.

  • Individual lawmman sponsor-tute
  • Fiar play - Dr. Lalnunpuia
  • Best player - Joseph Lalhmingthanga
  • Top Scorer - Lawngtlai Manchester Uited Fans Club
  • Best Goalkeeper - Elvis Lalthangzuala 

Post a Comment

Powered by Blogger.