Lawngtlai, April 28, 2022 : Nimin khan LADC Jubilee Celebration Committee Chairman Pu BN.Thangpuia, Executive Member I/c Art & Culture etc LADC ni bawk chuan Laifate mahni ke a ding a, ro kan in rel theihna tura Autonomous District Council kan nih Kum 50-na Golden Jubilee chu ropui taka lawm tum a ni a ti.
Nimin khan Pu BN.Thangpuia chuan, Lawngtlai District thuthar thehdarhtute nen inkawmna neiin April 29,.2022 hian LADC Golden Jubilee hawnna inkhawm neih a nih tur thu leh kumin kumtluang Golden Jubilee lawmna programme pawh siam a nih tur thu a sawi a. He hun kan lawmna turah hian Laifa hmun hrang hrang a awm te pawh sawm an ni a, hun hlimawm tak hmang a, Inpumkhatna leh hmasawnna kawng thar kan zawh zel theihna turin Programme pawimawh tak tak pawh buatsaih a nih tur thu a sawi lang bawk a ni.
Pu BN.Thangpuia chuan, tunah hian Lai Autonomous District Council ah 'Pathian leh kan ram tan' tih thupui neitu ten sorkarna nghet tak kan siam thei hi a lawmawm hle a. Kan Pathian hian a hun takah sorkarna min siam tir niin ka hria a, ram mipuite pawhin malsawmna kan dawn chho zel pawh ka beisei tak zet a ni a ti a. Tunah hian Pu V. Zirsanga kaihhruaina hnuaiah sorkar nghet takin a kal mek zel a. Harsatna hrang hrang karah Lairam mipuite pawhin hmasawnna rahbi thar kan rap chho zel dawn ni te pawhin a lang a. Chu hmasawnna leh malsawmna chu chang ve thei tura Ram mipuite pawh he Jubilee ah hian kan Inbuatsaih a ngai a ni a ti bawk.
Kumin Golden Jubilee lawmna turah hian inbuatsaihna kalpui mek a ni a. Sub Committee hrang hrang 10 din a ni a. April 29, 2022 hian a hawnna inkhawm te, Jubilee dar vuak leh Jubilee meidet te chu LADC Complex-ah neih a ni ang a. a lawmna puiber (Main celebration) chu November thlaah neih a ni ang.
Pu BN. Thangpuia hian Lawngtlai District MJA member te hnenah Jubilee T.Shirt a present bawk a ni.
Post a Comment