Lawngtlai,
April 30, 2022 : Lai
Autonomous District Council kum 50-na, Golden Jubilee lawmna bultanna chu nimin
chawhnu khan LADC Complex, CEM Office kawt zawlah neih a ni.
LADC
Golden Jubilee hi kumin chhung hian a lawmna chi hrang hrang kalpui tum a ni a,
nimin Golden Jubilee lawmna bultannaah hian LADC a Chief Executive Member Pu V.
Zirsanga chuan Jubilee meidetin, Jubilee puala siam Pura leh Lungphun a hawng
a, Golden Jubilee chu kumin chhunga lawm turin a hawng bawk.
He
huna khuallian Pu V. Zirsanga chuan LADC in kum 50 a tling chu lawmawm a tih
thu a sawi a, Pathian chu kan inhumhimna a nih zia a lang a ni a ti. 'British
awpna hnuaia India ramin zalenna a sual chhuah hnuah hnam hrang hrangin mahnia
rorelna neih an tum a, tha leh zung tam tak an seng bawk a. Lai leh Mara fate
pawhin hruaitu hmasate thawhrah avangin April 23, 1953 ah khan Pawi-Lakher
Regional Council tiin rorelna kan nei a, Lungleiah hawn a ni. April 29, 1972 ah
PLRC tih chu Pawi Autonomous District Council-ah hlankai a ni. Hemi kum atang
hian kum 50-na kan lo thleng ta a, Council kan nih atanga hmasawnna, kawng
hrang hranga min hruaitu leh malsawmna min hmuh tirtu Pathian hnenah lawmthu
kan sawi a ni' a ti.
'India
ramah hnam hrang leh tawng hman tam tak kan awm a, An tam dan ngaihtuahin
rorelna hrang nei tham pawh kan niin ka hre lo. Hetiang karah hian kan hnam
ziarang, tawng leh nunphung hi kan humhalh loh chuan chimralin kan awm ang tih
a hlauhawm takzet a ni' a ti a. Ram leh hnam anga hmasawnna kawngah tan lak a
ngaih thu sawiin. CEM chuan 'hmuh theih hmasawnna kawngah hma kan sawn hle a,
zrina kawngah pawh hma kan sawn hle a. Hetih lai hian kum 50 chhungin direct-a
IAS inziaktling pakhat pawh ka la nei thei lo a ni. Lehkhathiam hna hmu lo kan
pung tulh tulh bawk. Zirna lamah tan kan lak a ngei hle a ni' a ti bawk.
CEM
chuan politic kan kalpui dan thlirnawn a tul thu a sawi a, 'politic-a kan luh
chhan tam zawk hi chu ropuina leh chawimawina, lalna leh thuneihna politic-in a
kel tel hi kan duh vang a ni a, politic kan khelh chhan a ni bawk. Politic kan
khelh danah hian hnam a hmasa ber tur a ni. Mahni vua leh vang ngaihtuah zawnga
politic kan kalpui chin a lo awm a nih pawhin kum 50 kan tlin hnu hi chuan
helam hi kan dahthat a ngai' a ti a. 'Kristian kan nihna anga LADC huam chhunga
kohhran pawl hrang hrang te hian thawhhona leh impumkhatna tha zawk kan neih a
tul a ni' a ti bawk. CEM chuan 'zirnaah LADC in sum tam tak sen kan inhuam a,
ram leh hnam in hmasawnna rahbi a neih a, ram humhalhna kawngah hriatna leh
thiamna hi a pawimawh a ni tih he sorkar hian a hriat avangin theihtawpin hma a
la mek a ni' a ti a. Zirlaite pawh thahnemngai leh zual turin a sawm bawk.
CEM
chuan nungcha leh thing leh mau humhalh a tul thu a sawi a, 'tun atanga nungcha
leh thing leh mau kan tih cheureu chuan kan ram hi thlaler ramroah kan siam
ngei dawn' a ti a. Hnam inpumkhatna kawngah hmathar lak a tul thu CEM chuan a
sawi bawk.
He
huna thusawitu dang Lawngtlai Bawrhsap Dr. Andrew H. Vanlaldika chuan 'ADC kan
neih theih nana hruaitu hmasate kan hre reng a, tun thlenga thawktute leh a
kila lung pawimawhte chibai ka buk che u a, Laifa zawng zawngte chibai ka buk
che u a ni' ti a. 'ADC hi Laite Pathianin min pek a ni a, hei lo hi kan
inhumhimna dang a awm lova, Laifate tan chuan kan inpui, ka kulhbingsang, kan
inhumhimna a ni' a ti.
MLA Pu
H. Biakzaua chuan 'kan ram, kan hnam min humhimtu leh kan inpui neih chhun chu
LADC area huam chhung chauh hi a ni' a ti a. 'Khawi hmunah pawh awm mahila,
Laifate chu kan inhmangaih tur a ni a, kan nihna leh kan ziarangte pholang ngam
ila, heng kan tawngte, kan hnam culture-te kan venhim hian keimahni kan
invenghim a ni' a ti.
Nimina
LADC Golden Jubilee lawmna bultannah hian Pu VL. Hmuaka, LADC Chairman leh Rev.
Dr. Thla Awr, President ICLS & GS CBC (USA) ten thu an sawi a, Pu BN.
Thangpuia, LADC Golden Jubilee Celebration Commitee chairman-in inlawmna thu a
sawi bawk. He hunah hian Hnam ziarang tihlanna lam leh zai te thlirhoa
ngaihthlak a ni bawk.
Kum
1972 April 29 khan Pawi Lakher Regional Council chu District Council pathum
Lai, Mara leh Chakma District Council ah te then niin, kum tinin April 29 hi
Autonomous Sorkar chuan ni bik atan an hmang a ni.
Nimina
LADC Golden Jubilee hun hmannaah hian Pu V. Zirsanga, CEM LADC chuan Mizo
football player Jeje Lalpekhlua chu LADC Golden Jubilee Brand Ambassador nihna
a hlan bawk a ni.
LADC Golden Jubilee lawmna pui ber hi kumin November 2022 ah neih a ni ang.
Post a Comment