Lawngtlai, April 19, 2022 : Vawiin, April 19, 2022 khan Lawngtlai District Football Association buatsaihin CEM LADC Football Runing Trophy 2022 khelh tan a ni a, he hun hi Pu Hc. Lalthawmliana EM i/c PHE etc, LADC chuan khuallian niin a hmanpui.

Khuallian Pu Hc. Lalthawmliana chuan 'kan ramin Covid-19 avanga harsatna nasa tak a tawh laiin, kan thalaite hmakhua ngaihtuaha hetianga tournament ropui tak buatsaih a ni hi kan EM Sport Department changtu Pu C. Hrangthianga leh Lawngtlai DFA hruaitute an fakawm hle a ni' a ti.

Kan District-in sport discipline hrang hrangah hma a sawn theih nan theih tawpin hma a la a, EM Trophy Chest tournament te, Chairman Trophy Volleyball te, Lawngtlai Dist Boxing Champoinship te buatsaih a ni tawh a, tunah hian EM Trophy Betminton Bournament pawh buatsaihna a kal mek a ni a ti a. Pu Hc. Lalthawmliana chuan 'kan sawrkarin sport lamah nasa takin hma ala a, Sport Minister chak leh Mizoram thalai hmakhaw ngaitu, Pu Robert Romawia Royte chuan kum 2019 khan sport policy fel tak a lo duang tawh a. Hemi rahchhuah kalzelah tunah hian India rama football inelna sang ber ISL ah pawh Mizo thalai mi 27 lai tunah an khel mek a. An chhungkua leh kan ram tan hmasawnna ropui tak a ni' a ti.

Lawngtlai District-ah pawh nasa takin sport lamah sawrkarin hma ala a. Nuai 3000 man Residential Sport School, College Vengah te, District Sport Centre, Mampui, nuai 5019.43 man te, Lawngtlai Vengpui leh Chawngte a Artificial Grass phah turte hi a lawmawm hlein ka hria, a bik takin, kan sawrkar chungah leh Sport Minister Pu Robert Romawia Royte chungah thinlung takin lawmthu ka sawi a ni a ti bawk.

'Vawiina thalai rual lo kal khawmte pawh, rilru leh tihtak zeta thil inti a nih chuan hlawhtlinna in chang ang. Mi tam takin sport atangin eizawnna an hmu tawh a, nangni pawhin Pathian tihchunga thil intih phawt chuan Pathian malsawmna in chan ngei ka ring a ni' Pu Hc. Lalthawmliana chuan a ti bawk.

Vawiina CEM LADC Football Running Trophy khelh tan niah hian Lawngtlai-III Constituency chuan 2-1 in AOC Constituency an hneh. He tournament-ah hian MDC Constituency 16 an tel a ni. CEM LADC Football Running Trophy 2022 hi Lawngtlai District chhunga MDC Constituency te tan chauh buatsaih a ni.

Post a Comment

Powered by Blogger.