Aizawl, March 01, 2022 : Mizorama cham mek Union Minister of State for H&FW Dr. Bharati Pravin Pawar-i’n nimin khan Health Minister Dr R Lalthangliana leh Health dept hotu dangte a kawm.
MINECO Conference Hall-a inkawmhonaah hian Health Minister chuan Mizoram mamawhte Union Minister hnenah ziakin a thlen a ni.
Dr. Bharati Pravin Pawar chuan National Family Health Survery thar bera Mizoram dinhmun thenkhat tarlan, a bikin thisen tlachham tam dan tarlan te, zuk leh hmuam chungchanga Mizoram dinhmun tarlan te leh nu naupai leh raipuar te a hun taka inentir kawnga hnufual nia langte siam that nan tan lak theih a duh thu a sawi a. Health Department official-te chu thingtlanga hriselna dinhmun ngai pawimawh zual tur leh inenkawlna hmun – CHC, PHC leh Sub Centre te chu tlawh fo thin turin a chah a ni.
Health Minister Dr. R. Lalthangliana chuan PHC leh CHC a Ambulance hman mek te chu a hlui tawh avangin Ambulance thar 30 Mizoram pe turin a ngen a. Hmarchhak biala state-te chu state dang te nen tehkhinin an hnufum bik thu sawiin Minister chuan hemi avang hian sum hmanga inpuihna leh thil dangte siam that leh ennawn a tul a, chumi atan chuan Union Health Minister tel ngeiin Hmarchhak Health Minister-te’n hengte hi an sawiho a tul nia a hriat thu te a sawi a ni.
Meeting-ah hian hriselna kawng hrang hranga Mizoram dinhmun tlangpui te, mipuiten hriselna tha leh inenkawlna tlawm an neih theih nana mamawh hrang hrang te, Mizorama Covid-19 dinhmun tlangpui te leh Zoram Medical College dinhmun leh mamawhte Health & Family Welfare Department leh a peng dangte bakah Zoram Medical College-a hnathawktu ten an tarlang a ni.
Post a Comment