Aizawl, March 11, 2022 : Vawiin March ni 11, 2022 (Zirtawpni) khan Mizoram Pradesh Congress Committee chuan Friday Political Session leh mithar lawmluh inkhawm Golden Hall, Congress Bhavan-ah an nei.
MPCC President Pu Lalsawta mithar lawmluhna leh fuihna hun a hmang a, "Midangte thawhpui thiam leh midang nena thawhho thiam hi chakna leh dinchhuahna a ni," a ti.
Pu Lalsawta chuan, "Ram tana tha thil ṭha tihna kawngah hian huaisen a pawimawh a. Thil dik lo leh ṭha lo hmu lo der lova in finchhuah a pawimawh tih sawiin, thil tha tihna kawngah engmah insum tur a ni lo. MNF party hian mi huaisen an nei lo a, an hotupa kal dan tha lo nia an hriat pawh 'a dik lo' ti ngam an awm loh avangin tunah hian MNF sorkar leh Mizoram mipui kan buai phah a ni. Party leh sorkara mi an huaisen theih loh chhan chu tlaktlum loh an hlauh vang a ni. Tlaktlum loh hlauh hi ram tan a him lo a ni," a ti.
Pu Lalsawta chuan, Assembly Budget session-ah Congress MLA te chet dan chu a mawi a tih thu sawiin, house a chetdan mawi tak lantir zel tura a duhthu a sawi a, "Thusawi thiam ringawt hi a ni lo; ram tana thil tha tiha change siam a ngai zawk a ni. Ṭhat loh theih lohna bawm chu Congress party tan chauh a ni lo, Mizoram tan a ni," a ti.
CLP Leader leh MPCC Treasurer ni bawk Pu Zodintluanga chuan Mizoram Legislative Assembly pariatna Budget Session thlirletna neiin, "Tun budget session chu budget awmze nei lo, mipui sum tam tak awmze nei lova hman tumna, a thlawna hun leh tha senna mai a ni a, ram tana awmze nei lo budget session a ni," a ti. "Budget en hian Chief Minister-in a Minister-te a ring zo thlawt lo tih chiang takin a lang. Minister-te hna chanpualah hna thawhna tur pakhatmah a dah duh miah lo a, ama department chan Finance-ah a dah teuh a. Minister-ten hna thawh an tum tak tak dawn chuan CM hnenah an dil zel a ngai dawn a ni. MNF sorkar hmasaah Police-te kut an phuar a, tuna an sorkarah chuan an Minister-te kut an phuar thung. Sum enkawl thiamin ram sum a enkawl lai chuan ramin hma a sawn a, ram sum leh pai dinhmun siamthat a ni thin. Kalphung nei lo leh kal ngaihna hre lo hnuaiah chuan sorkar hnuaia thawk mithiamte pawhin tih ngaihna an hre lo. Chief Minister tuina ber leh sorkar flagship programme Mau/Rua chin bansanin Bekang leh Telhawngah min tui san leh tawh a ni," a ti bawk.
Pu Zodintluanga Ralte chuan ZPM leader Pu Lalduhoma'n No Confidence move a tum chungchanga a opposition puite a bei chu a mak a tih thu sawiin, "Congress party-ah chuan hetiang thil hi PAC-in fel takin a rel thin a ni. No-Confidence awmze hre lovin No-Confidence move a tum a. Miin no-confidence an move chhan chu member tam zawk nih inchuhin sorkar kan paihthla thei a ni, tih lantir turin an move thin. No Confidence motion move tura support ngai zat MLA pawh nei lova No-Confidence move tum chu a kalphung lo hle. Tun budget session chu Pu Lalduhoma thil hriat loh hrilhfiah a tam a, amahin a hlawkpui hle ang ka ring," a ti bawk.
Post a Comment