Rauthla, February 02, 2022 : Mizorama State Level Sports Association 32 intelkhawmna United Sports Association of Mizoram (USAM) chuan Chief Minister zahawm tak Pu Zoramthanga’n kum 2022-23 Mizoram budget atan cheng vaibelchhe 14,008 zet mai Assembly House Budget session-ah pharh a, kum hmasa aia za zela 28.65% zet maia a pung chu lawmawm an tih thu an sawi a. Hetih lai hian Sports Budget (Sports & Youth Services Department) pharh tura ruahman erawh kum hmasa aia hniam zawk, cheng nuai 2422.12 chauh a ni mai hi kan hrethiam lo takzet a ni an ti.
USAM chuan Kum 2018-19 khan Sports Budget pumpui chu cheng nuai 5077.21 a tling tawh a, hemi hnu hian hniam chho zelin kum 2022-23 ah chuan Mizoram State Budget pumpui (Rs.14,008 Crore) atanga chhut a Sports Budget tura ruahman (Rs.2422.12 lakh) chu 0.17% chauh a tling phak ta a ni an ti.
USAM chuan Thalaite department-a kan ngaih ve Sports & Youth Services Department budget hi pung lova kumtin a hniam zawnga a kal chho hi sawrkarin thalaite a ngaih pawimawh lohnaah kan ngai a, sports-ah nasa takin hma kan sawn a, India mai ni lo khawvel huapah kan lan chhoh tawh a. Chutihlaia budget hniam zawnga sawrkarin min kalpui zel a nih chuan kan thalaite hma khua a thim hle dawn tihna a ni. Sports avangin nasa takin Mizoram hming a tha a, kan ram hmel timawitu a nih mek lai a a sang zawng ni lo, a hniam zawnga a kal zel mai hi a lungchhiatthlak kan ti takzet a ni an ti a. Sports Budget hi pung ngei se kan ti a, a pun theihna tur a nih chuan eng chen pawh kal kan huam dawn a ni an ti bawk.
Post a Comment