Aizawl, March 03, 2022 : Governor Hari Babu Kambhampati-a’n Mizoram mipui tam zawkin Central Sawrkar Scheme atanga hamthatna an neih theihna tur nimin khan Mizoram Baptist Kohhran Hruaitute a sawipui.
Governor Hari Babu Kambhampati-a chuan Mizoram hmun hrang hrang a tlawh hnu leh tlawmngai pawl hruaitute a kawm hnuah Mizoram mipui tam zawkin Central atanga Social Security Scheme tha tak tak te an hriat loh avangin an dawng lo tih a hmuh chhuah thu a sawi a. Hei hi thinlung taka a vei thu sawiin vawi tam tak Bank te, sawrkar Department hotute leh Tlawmngai pawl hruaitute a kawmnaah pawh a sawi thin, a ti a. Mizoram mipui tam thei ang berin Central Sawrkar atanga hamthatna an dawn chu an chanvo a ni a; tunah zirtirna tha tawk rih lo mah se hriattir ngei chu an chanvo a ni, a ti.
Governor Hari Babu Kambhampati-a chuan Mizoramah Kohhran chu mipuite rawngbawltu pawimawh ber pakhat a ni a; mipuiin kohhran hruaitute thu an ngaichang a, kohhran hruaitute thusawi chuan zawm a hlawh a. Hei vang hian mipuiten thil tha an dawn theihna turin Kohhran hruaitute chu an hun leh hmun remchang neihnaah te thanemngai taka welfare scheme leh social security scheme te mipui zirtir turin a ngen a ni.
Post a Comment