Niawhtlang, March 24, 2022 : Niawhtlang YLA leh Joint VC I&II chuan nimin khan thuchhuah siamin, March 20, 2022 a an khaw mi Rualteikhuma'n a fapa Lalhmingmawia, kum 13 mi hleihluak taka kut a thlak chu pawi an tih thu an sawi a, he thil hi pawikhawihna lian tak a ni an ti bawk.

Niawhtlang YLA leh Joint VC thuchhuaha tarlan a nih danin, Rualteikhuma hian a fapa Lalhmingmawia chu zilhhauin, tiang hman mai duh tawkin lovin a fapa chu chema sah tumin a vei thuak thuak a, a fapa hian a kut dinglama lo invengin a kut zungte uaithla hnawpin a sat a, hmun thum laiah hliam a tuar bawk. Lalhmingmawia hian a mah hringtu pa hi hlauin tlan san losela, thil pawi tak thleng thei a ni.

Niawhtlang YLA leh Joint VC chuan, 'Pu Rualteikhuma hi Niawhtlang atanga hnawhchhuah niin, khaw chhunga a khawsak zui zel phal a ni lova. khualpang zina Niawhtlang a luh pawh phal a ni lova, Niawhtlang leilung a rah hrim hrim phal a ni lo' tiin thuchhuah an siam. 

Niawhtlang YLA leh Joint VC te chuan he an thuchhuah hi a fapa laka a pawikhawihna bakah an chhungkua leh khawtlanga an khawsak phungte zirchian a ni a, a nupui leh fanaute leh khawtlang mipuite himna bakah ama sahimna ngei pawh ngaihtuah  tela siam a ni an ti.

Rualteikhuma hian he an thuchhuah hi a ngai pawimawh lova, Niawhtlangah a la khawsa lui a nih chuan a chungah engpawh thleng se khawtlangin mawh a phurh loh tur thu an sawi tel bawk.

Post a Comment

Powered by Blogger.