Lawngtlai, March 24, 2022 : Vawiin khan Lawngtlai District Fire Prevention Committee leh Central YLA huaihawtin CYLA Hall Lawngtlai-III ah Awareness Campaign on Fire Prevention neih a ni a, Pu C. Rongura, EM (LAD), LADC chuan khuallian niin a hmanpui.
Pu C. Rongura chuan 'Mei si te reuh te avangin ram zau tak a kang thei a, ram a kán hian thing leh mau, nungcha tam tak an kang ral thin. Meikhu leh boruak bal avangin hriselna pan deuh te tan chuan a hahthlakin thawhah a siam a; khawlum nasa tak a siamin a lo thleng thin' a ti a. Sawrkarin March 15, 2022 hmaa lohal tura thu an chhuah, an zawm ṭha chu lawmawm a tih thu a sawi a. Thal an inṭan dawn chauh a, kangmei chhuak palh awm thei lakah fimkhur leh zual turin kalkhawmte a fuih bawk a ni.
Khuallian chuan ram chhunga hmun mawi leh hlu tak tak, Phawngpui tlang te, Ngengpui Wildlife Sanctuary te, Chhimtuipui te, Lungmawi (Lungmak) te leh Chamdur Project te chu a nihna ang taka kan hman thiam hunah LADC leh a mipuite tan a hmasawnna thlen tu tur an la ni tih a sawi bawk.
Vawiina Awareness Campaign on Fire Prevention programme hi Pu K. Romawia, Member Secretary, District Level Committee On Fire Prevention & DCCF, LADC Lawngtlaiin a kaihruai a, Rev. V. Lalhmingsanga, AOC Bialtu Pastor-in hunserh hmangin, Pu Rinmuana, MFS, Dy. Conservator of Forest, Chhimtuipui Wildlife Division, Lawngtlaiin Power Point Presentation a nei a, Pu C. Sangliana, Dy. Conservator of Forest, LADC Lawngtlai in lawmthu (vote of thanks) a sawi a ni.
Post a Comment