Aizawl, March 11,, 2022 : Lengpui Airport cheithat hna thawh mek nimin tlai dar 4:30 vela chim chu vawiin khan ZPM Legislature Party Secretary Dr. Vanlalthlana, MLA leh Party hruaitu thenkhat ten an tlawh. ZPM chuan he chhiatna, hnathawktu hliam tuar awm leh hmasawnna sum tam tak engmah lo a chang ta mai chu pawi an tih thu an sawi a. He chhiatna thlenga mawhphurtu hi zawng chhuak a, dan anga hremna pe ngei turin Mizoram Sorkar kan phut a ni an ti.
Dr. Vanlalthlana chuan, “Assembly session neih zawh taka zawhna chhanna-ah khan, Airport-ah hian Vbch. 47 chuang restricted tender-in pek a ni tawh a. Tuna Mizorama sorkar department 49 kan neih zinga department 21 hian Vbc 47 hi budget-ah an nei phak lo a ni. Hetiang zat zet sum sen a ni chunga a chim thei hi kan ngaih a tha lo,” a ti a. “He hnaah hian tute emaw ni mantang ei an awm em tih te pawh session-ah kan sawi chhuak hial a, thil fel lo a awm a nih chuan a tawp thlengin kan umzui dawn a ni,” a ti bawk.
Dr. Vanlaltathlana chuan, “Airport tha hi kan duh lo a ni lo a, chhuang taka hei hi kan airport a ni, tih pawh kan duh ve. Amaherawhchu, hemi piah lamah mipui ten thil mamawh tam tak kan nei a ni. Tunah hian health care scheme-ah Vbc 59 vel sawrkarin mipui sum a bat pawh a pe thei lo a. Hetih laia airport chei nan sum tam tak hman a ni a; Mizoramin central atanga kan hmuh, a tul apianga a kan hman theih Vbc 18 vel zet pawh airport chei nan bawk hman a ni. Hetiang hi kan ram dinhmun a nih mek laia Vbc 47 em em airport cheina atana hman a ni hi; hetiang em em lo deuh hian i ti hram ang u, kan ti a ni,” a ti bawk.
Tuna Airport cheina chim hi Baggage Make-up Area (BMA) niin hna thawktu hi KR Construction a ni a. Dt. 21.4.2021 daih khan hna thawh tan a lo ni tawh a. Hetiang a nih lai hian Dt. 20.9.2021-ah work order pek chauh a ni a (No.B.20011/43/CE-BD/PWD/2019/68), chumi awmzia chu KR Construction hian work order nei hauh lo leh ‘restricted tender’ hmingpu siin thla 5 vel hna a lo thawk tawh tihna a ni.
Post a Comment